बहुल राष्ट्रिय राज्य बनाउने भन्दै महतोले छोडे लोसपा

१४ फागुन, काठमाडौं । नेता राजेन्द्र महतोले लोकतान्त्रिक समाजावदी पार्टी (लोसपा) छाडेका छन् । उनले नयाँ अभियानको घोषणा गर्दै लोसपा छाडेका हुन् । सोमबार काठमाडौंमा विशेष पत्रकार सम्मेलन गर्दै महन्थ ठाकुरसँग अलग्गिएर उनले ‘राष्ट्रिय मुक्ति क्रान्ति’ अभियान घोषणा गरेका छन् । 

अब बहुल राष्ट्रिय राज्य बनाउने उनले लक्ष्य रहेको बताएका छन् । यो अभियानले पार्टीको निर्माणदेखि सबै संरचना तयार गर्ने भन्दै लोसपा, जसपालगायतका मधेसवादी पार्टी साथै एमाले, कांग्रेस माओवादी विचार राख्नेहरूका लागि खुल्ला रहेको उनको भनाइ थियो ।

महतो यसअघि लोसपाका वरिष्ठ नेता थिए । जसपा विभाजनपछि ठाकुर, महतोलगायत मिलेर लोसपा बनाएका थिए । तर, पार्टीले गति लिन नसकेको भन्दै उनले ठाकुरको आलोचना गर्दै आएका छन् ।