भृकुटीमण्डपमा प्रहरी छिरेपछि भाँडियो वार्ता

१४ फागुन, काठमाडौं । मिटरव्याज पीडितहरुसँग सोमबार हुने निएको वार्ता विथोलिएको छ । गृह मन्त्रालयमा बिहान ११ बजे वार्ता बस्ने भनिएपनि ९ बजे पीडित बसेकै ठाउँमा प्रहरी पुगेर तितरवितर पार्न खोजेपछि वार्ता विथोलिएको हो ।

सडक आन्दोलनको नेतृत्व गरिरहेका मिटरब्याज तथा ठगीविरुद्ध किसान मजदुर संघर्ष समितिका नीर्घ नविनका अनुसार, बिहान ९ बजे मिटरब्याज पीडित बसिरहेको भृकुटीमण्डपमा गएर पीडितलाई हटाउन खोजेको थियो ।

जिल्ला प्रशासन कार्यालयको पत्रसहित प्रहरी वृत्त सिंहदरबारका डीएसपी भृकुटीमण्डप पुगेका थिए ।  हाल बसिरहेको ठाउँ समाज कल्याण परिषद्को भएको भन्दै खाली गर्न भन्दै प्रहरीले जबरजस्ती हटाउन  प्रयास गरेका थिए । 

गृह मन्त्रालयमा आइतबार सह–सचिव रुद्रप्रसाद पण्डितको नेतृत्वमा गठित समितिले मिटरब्याज पीडितका तर्फबाट संघर्ष समितिका अध्यक्ष अवधेश कुशहवा नेतृत्वको टोलीसँग पहिलो चरणको वार्ता गरेको थियो । दुवै पक्षले एकअर्काको कुुरा सुनेपछि सोमबार बिहान ११ बजे फेरि बैठक बस्ने गरी छलफल टुंगिएको थियो । 

वार्ताका लागि जानुअघि नै पीडितलाई प्रहरी लगाएर हटाउन खोजिएको भन्दै पीडित पक्षले वार्ता नजाने निर्णय गर्यो । प्रहरीले सामान उठाउने प्रयास गरेपछि उनीहरु भृकुटीमण्डपमै बसिरहेका छन् ।