६१ केजी सुन जाँचबुझ आयोगले माग्यो थप १५ दिन

१४ फागुन, काठमाडौं । तस्करी सुनको छानविन गर्न गठित उच्चस्तरीय जाँचबुझ आयोगले काम नसकिएको भन्दै थप १५ दिन समय मागेको छ । सरकारले १५ असोजमा ३ महिना समय दिएर गठन गरेको आयोगले तोकिएको समयमा काम पूरा नगरेपछि पुनः २ महिना समय थप गरिएको थियो । थपिएको २ महिनाको समय पनि १५ फागुनमा सकिँदैछ ।

आयोगले १५ फागुनसम्म प्रतिवेदन प्रस्तुत गर्न केही समय नपुग हुने बताएकोछ । यही फागुन मशान्तभित्र प्रतिवेदन प्रस्तुत गर्ने गरी अवधि थप हुन अनुरोध गरी गृह मन्त्रालयमार्फत नेपाल सरकारसमक्ष अनुरोध गरिएको व्यहोरा सम्बन्धित सबैमा जानकारी गराइन्छ भन्दै विज्ञप्ति जारी गरिएको हो । 

त्रिभुवन विमानस्थल भन्सार कार्यालयबाट गत साउनमा ६० किलो भन्दा बढी सुन तस्करी भएको पाइएपछि प्रमुख प्रतिपक्षी दल नेकपा एमालेले उच्चस्तरीय छानबिनको माग गर्दै लगातार संसद अवरोध गरेपछि दलीय सहमतिमा सरकारले १५ असोजमा पूर्वन्यायाधीश डिल्लीराज आचार्यको अध्यक्षतामा जाँचबुझ आयोग गठन गरेको थियो । 

आयोगले राजस्व अनुसन्धान विभाग, प्रहरीको केन्द्रीय अनुसन्धान ब्यूरो, सुन तस्करीमा संलग्नको अभियोग लागेका १०० भन्दा बढी व्यक्तिसँग बयान र सोधपुछ गरिसकेको छ । थपिएको १५ दिन अवधिमा आयोग प्राप्त प्रमाणहरुको अध्ययन, विश्लेषण गरी प्रतिवेदन तयारी हुने जनाएको छ ।