२४ किलो चरेशसहित पाँचजना पक्राउ

१४ फागुन, कपिलवस्तु। अवैध लागूऔषध चरेस जस्तो देखिने वस्तु करिब २४ किलो ५ सय ६० ग्रामसहित ५ जनालाई प्रहरीले पक्राउ गरेको छ । 

पक्राउ पर्नेहरूमा धादिङ खनियाबास गाउँपालिका ५ का ५९ वर्षीया सेती तामाङ, ६६ वर्षीय रेगदोन तामाङ, सल्यान सिद्धकुमाख गाउँपालिका ४ का ४० वर्षीय थल बहादुर रोका, धादिङ खनियाबास गाउँपालिका ५ का ५२ वर्षीया साङ जोम तामाङनी र रूकुम भुमे गाउँपालिका २ घर भई दाङ लमही नगरपालिका ४ का ३७ वर्षीया भावना बुढा रहेका छ्न् । 

इलाका प्रहरी कार्यालय कृष्णनगरबाट खटिएको प्रहरीले कृष्णनगर नगरपालिका २ लिङ्गेटबाट नेपालबाट भारततर्फ जाँदै गरेका सेती तामाङलाई ५ किलो ५ सय ५५ ग्राम, रेगदोन तामाङलाई ५ किलो ३ सय ६५ ग्राम, थल बहादुरलाई ४ किलो ६ सय १५ ग्राम र साङ जोमलाई ५ किलो ४ सय ८० ग्राम लागूऔषध चरेस जस्तो देखिने वस्तुसहित पक्राउ गरेको हो ।

साथै थप अनुसन्धानको क्रममा भावना बुढाको समेत संलग्नता रहेको खुल्न आएपछि उनलाई कृष्णनगर नगरपालिका १ शिवानगरबाट थप ३ किलो ५ सय ४५ ग्राम चरेसजस्तो देखिने वस्तुसहित फेला पारी प्रहरीले पक्राउ गरेको हो ।