भारतीय गजल गायक पंकज उदासको निधन

१४ फागुन, काठमाडाैं । भारतीय गजल गायक पंकज उदासको ७२ वर्षको उमेरमा निधन भएको छ । गायक लामो समयदेखि बिरामी थिए । उदासको परिवारले विज्ञप्ति जारी गर्दै उनको निधनको जानकारी साेमबार दिएको छ । विज्ञप्तिमा पंकज कुन रोगबाट ग्रसित थिए भन्ने जानकारी अहिलेसम्म खुलेको छैन ।

पंकज उदासको आज बिहान ११ बजे मुम्बईमा निधन भएको हो । केही समयदेखि उनलाई मुम्बईको ब्रीच क्यान्डी अस्पतालमा भर्ना गरिएको थियो । स्राेतका अनुसार पंकजलाई केही महिनाअघि क्यान्सर भएको पत्ता लागेको र केही महिनादेखि उनीले कसैसँग भेटघाट नगरेकाे स्राेतले बताएकाे छ । उनको अन्तिम संस्कार भोलि मुम्बईमा गरिने छ ।

पंकज गजल गायनको दुनियाँमा एक ठूलो नाम थियो। उनले ‘चिठ्ठी आयी है’ गजलबाट प्रसिद्धि पाएका थिए । यो गजल सन् १९८६ मा रिलिज भएको फिल्म ‘नाम’ मा समावेश गरिएको थियो । पंकजले 'ये दिल्लगी', 'फिर तेरी कहानी याद आयी', 'चले तो काट ही जायेगा' र 'तेरे बिन' जस्ता धेरै गजलहरूलाई आफ्नो आवाज दिएका छन्।

पंकजले गायनमा आफ्नो क्षमता प्रमाणित गरेर उत्कृष्ट आवाजका लागि धेरै पुरस्कारले सम्मानित भएका थिए । यसमा पद्मश्री (2006), महाराष्ट्र गौरव पुरस्कार (2012), फिल्मफेयर पुरस्कार (1988) फिल्म 'नाम' को गीत 'चिठी आयी है' को लागि उत्कृष्ट पार्श्व गायक श्रेणीमा समावेश छ। यसबाहेक उनले एल.एस. गाल पुरस्कार (1985), संगीत नाटक अकादमी पुरस्कार (2003) र भारतीय फिल्म र टेलिभिजन एकेडेमी (IIFA) पुरस्कार रहेका छन् ।