लघुवित्त पीडित संसद प्रवेशबारे छानविन गर्न प्रहरी प्रमुखले बनाए समिति

१४ फागुन, काठमाडौं । नेपाल प्रहरी प्रधान कार्यालयले निषेधित क्षेत्र बानेश्वरस्थित संसद् भवनमा लघुवित्त पीडित प्रवेश गरेको विषय गम्भिर भएको भन्दै छानबिन गराउन एसपीको नेतृत्वमा छानबिन समिति बनाएको छ ।

उपत्यका प्रहरी कार्यालयका एसएसपी दिनेशराज मैनालीको संयोजकत्वमा तीन सदस्यीय छानबिन समिति गठन गरिएको प्रहरी प्रधान कार्यालयले जानकारी दिएको छ । समितिमा जिल्ला प्रहरी परिसर, काठमाडौंका एसपी नवराज अधिकारी र उपत्यका प्रहरी कार्यालय, रानीपोखरीका डीएसपी दिनेश घिमिरे सदस्य छन् ।

समितिलाई लघुवित्तका ऋणीहरु कसरी निषेधित क्षेत्र पार गरेर संसद् भवनभित्र प्रवेश गरे र कहाँ कहाँ कमजोरी रह्यो भन्ने विषयमा अध्ययन गरेर प्रतिवेदन बुझाउन निर्देशन दिइएको छ । सोमबार दिउँसो लघुवित्तका ऋणी संसद् भवन परिसरभित्र छिरेपछि प्रहरीले ४८ महिला र एक पुरुषलाई नियन्त्रणमा लिएको थियो । पक्राउ परेकाहरुलाई प्रहरी वृत्त, बानेश्वरमा राखिएको छ ।

मिटरब्याज पीडित संसद् भवन परिसरमा प्रवेश गरेको विषयले विषयले राजनीतिक चर्चा पनि पाएको छ । गृहमन्त्री नारायणकाजी श्रेष्ठ र सभामुख देवराज घिमिरेले आईजीपी बसन्त कुँवरसँग यसबारे जानकारी मागेका थिए । राजनीतिक तहमा बढी हल्ला हुन नपाउँदै प्रहरीले छानविन समिति बनाएको हो ।