वीरगंज कलेजले दुई दिने खाना तथा सांस्कृतिक मेला आयोजना गर्दै

१४ फागुन । वीरगञ्ज वीरगञ्जमा रहेको वीरगन्ज कलेजले सिक्दै कमाउँदै कार्यक्रम’ अवधारणा अनुरूप दुई दिने खाना तथा सांस्कृतिक मेला आयोजना गर्ने भएको छ। सोमबार कलेज परिसरमै पत्रकार सम्मेलन गरेर कलेजका अध्यक्ष डाक्टर दिपेन्द्र कुमार चौधरीले यही फागुन १८ र १९ गते खाना तथा सांस्कृतिक मेलाको आयोजना गर्न लागिएको जानकारी दिए ।

कलेजमा अध्यनरत विद्यार्थीहरूका लागि रात्री बजारको अवधारणा अनुरूप ‘सिक्दै कमाउदै कार्यक्रम’ अन्तर्गत दुईदिने ‘खाना तथा सांस्कृतिक मेला’को आयोजना गर्न लागिएको उनले बताए ।

फाल्गुन १८ र १९ गते दुवैदिन दिउँसो २ बजेदेखि राति १० बजेसम्म खाना तथा सांस्कृतिक मेला आयोजना गरिने उनले बताए ।दुई दिने मेलामा खानाका परिकारका ३२ वटा स्टल रहने उनले बताए ।मेलामा १५ देखि २० हजार दर्शक आउने अनुमान गरिएकोपनि उनले जानकारी गराए।

मेलामा कलेजमा अध्ययनरत विद्यार्थीहरूको नृत्य, गीतहरूको पनि प्रस्तुति रहने पत्रकार सम्मेलनमा कलेजका प्रमुख विनोद गुप्ताले जानकारी दिए ।

विद्यार्थीहरूमा सिक्दै कमाउदै र उद्यमशिलताको अवधारणा विकास गर्न तथा बारा-पर्साको लोक सांस्कृतिक तथा परम्परागत खानाको प्रबर्धन गर्नका लागि मेला आयोजना गर्न लागिएको पत्रकार सम्मेलनमा अध्यक्ष चौधरीले बताए ।