टेरामक्स प्रकरणमा पुर्व र बहालवाला मन्त्रीसहितका अधिकारीविरद्ध विशेषमा मुद्दा दायर गरिँदै

१५ फागुन, काठमाडौं । अख्तियार दुरुपयोग अनुसन्धान आयोगले टेरामक्स खरिदमा भएको भ्रष्टाचार प्रकरणमा पूर्व र वहालवाला मन्त्रीसहितका कर्मचारीविरुद्ध विशेष अदालतमा मुद्दा दायर गर्ने तयारी गरेको छ । टेरामक्स प्रकरणमा बयान लिने काम सकिएपछि मुद्दा चलाउने तयारीमा अख्तियार पुगेको हो । 

सेक्युरिटी प्रिन्टिङ प्रेस, अडियो प्रकरणको पनि छानबिन सकिएको छ । तत्कालीन सञ्चारमन्त्री गोकुल बाँस्कोटाले ७० करोड कमिसनको कुरा गरेको अडियो २०७६ फागुनमा सार्वजनिक भएको थियो । यो विवादपछि बाँस्कोटाले राजीनामा दिएका थिए । यी सबै विषयलाई अख्तियारले एकसाथ अघि बढाएको छ । 

प्रतिनिधिसभा अन्तर्गतको सार्वजनिक लेखा समितिको मंगलबारको बैठकमा अख्तियारका प्रमुख आयुक्त प्रेमकुमार राईले टेरामक्स प्रकरणको अनुसन्धान सकिएर मुद्दा बनाउने तयारी भइरहेको जानकारी दिएका छन् । यो प्रकरणमा खरिद प्रक्रिया सुरु भएयताको मन्त्रीदेखि सहसचिवसम्मलाई विपक्षी बनाएर मुद्दा दर्ता गराउने अन्तिम रहेको राईले बताएका छन् । 

संसदको सार्वजनिक लेखा समितिले मंगलबार विगतमा दिएको निर्देशनमा के भइरहेको भनेर अख्तियार प्रमुख राईसँग छलफल गरेको थियो । सो छलफलमा उनले टेरामक्स खरिदमा भएको भ्रष्टाचारमा संलग्नलाई कारवाही गर्ने प्रक्रिया अगाडि बढाउन मुद्दा बनाउने काम भइरहेको जानकारी दिएका थिए । उनले केही समयमा नै यसको रिजल्ट आउट हुने बताए । 

टेरामक्स प्रकरणमा तत्कालीन सूचना तथा संचार प्रविधिमन्त्री ज्ञानेन्द्रबहादुर कार्की र बहालवाला स्वास्थ्य तथा जनसंख्यामन्त्री मोहनबहादुर बस्नेतसँग बयान लिएको थियो । पूर्वमन्त्री गोकुल बाँस्कोटाले भने सुटुक्क अख्तियार पुगेर बयान दिएका थिए । प्रमुख राजनीतिक दलबीच तत्काल टेरामक्सको विषय अगाडि नबढाउने सहमति गरेका थिए । तर त्यो सहमति राष्ट्रिय सभाको निर्वाचनका क्रममा भाँडिएको बताइएको छ । 

एमालेलाई राष्ट्रिय सभामा मागेजति सीट दिन गठबन्धन तयार नभएपछि दलहरूबीच भएको टेरामक्स प्रकरणलाई हाल नचलाउने भनेर भएको सहमति भाँडिएको हो । टेरामक्समा कांग्रेसका मन्त्रीहरूलाई टार्गेट गरिएको छ । कांग्रेस र माओवादी भने अख्तियार प्रमुखले टेरामक्सको मुद्दा अगाडि बढाएमा नक्कली शरणार्थी प्रकरणमा राईलाई अप्ठ्यारो बनाउने भन्दै एमालेलाई चेप्न खोजेका थिए । टेरामक्स अगाडि बढ्दा एमालेका गोकुल बाँस्कोटा पनि मुछिने सम्भावना छ । 

तर, आजको छलफलमा राईले यी राजनीतिक विषय भने उठाएका थिएनन् । उनले हाल आयोगमा २८ हजार उजुरी रहेको जानकारी दिए । उनले तीमध्ये कतिपय उजुरीका आधारमा मुद्दा दायर गरिएको पनि बताए । अख्तियारले सार्वजनिक जग्गा, प्रति जग्गामा मुद्दा लडेको पनि बताए । सार्वजनिक जग्गा अतिक्रमण बढ्दो देखिएको पनि उनको भनाइ थियो । त्यस्तै, आईटी, सूचना प्रविधिमा पनि अनुसन्धान भइरहेको उनको भनाइ थियो ।

अख्तियारमा जनशक्ति अभाव रहेको पनि राईले बताए । उनले कर्मचारी अख्तियारमा दुई वर्ष बसेपछि थप बस्न नमान्ने गरेको बताए । त्यस्तै, वाइड बडी जहाज खरिद प्रकरणको अनुसन्धान भइरहेको पनि राईले जानकारी दिए । उक्त प्रकरणमा अन्य मुलुकबाट सूचना लिनका लागि सम्बन्धित देशसँग सरकारले सहमति गरि दिनुपर्ने बताए । मुलुक बाहिरबाट पनि भ्रष्टाचार हुने गरेकाले सरकारले द्विपक्षीय सहमति गर्नुपर्ने उनको भनाइ थियो ।

टेलिकम्युनिकेशन ट्राफिक मनिटरिङ एन्ड फ्रड कन्ट्रोल सिस्टम अर्थात् टेरामक्स प्रकरणमा संलग्नको बयान लिने काम सकिएको उनले जानकारी गराए । यो विषयमा अब छिटै टुंगोमा पुगिने उनको भनाइ छ । उनले सुरक्षण मुद्रण केन्द्र अन्तर्गत सेक्युरिटी प्रेस खरिद योजनाको टेप प्रकरणको पनि अनुसन्धान भइरहेको बताए ।

नेपाल दूरसञ्चार प्राधिकरणले टेरामक्स खरिद एवं जडान गर्ने योजना अघि सारेको थियो । सुरुदेखि नै विवादित यो योजनामा चरम भ्रष्टाचार भएको भन्दै संसदीय समितिको सिफारिसमा अख्तियारले अनुसन्धान थालेको थियो ।