संसद परिसरबाट पक्राउ परेका लघुवित्त पीडितलाई ७ दिन हिरासतमा राखिने

१५ फागुन, काठमाडौं । जिल्ला प्रशासन कार्यालय काठमाडौंले संघीय संसद भवन परिसरभित्र पसेर प्रदर्शन गरेका लघुवित्तका ऋणीहरूलाई ७ दिन हिरासतमा राख्न अनुमति दिइएको छ । प्रशासनले ४९ जनालाई ७ दिन हिरासतमा राख्न प्रहरीलाई अनुमति दिएको हो । 

एक जना पुरूष र ४८ जना महिलालाई प्रहरीले पक्राउ गरेको थियो । उनीहरूमाथि सार्वजनिक शान्तिविरूद्धको कसुरमा म्याद थप भएको जिल्ला प्रहरी परिसर काठमाडौंका प्रवक्ता एवं एसपी नवराज अधिकारीले जानकारी दिए । सोमबार दिउँसो ऋणीहरूले प्रहरी छलेर संसद भवनभित्र पसेका थिए । 

भवनको परिसरमा पुगेर उनीहरूले न्याय माग गर्दै नाराबाजी गरेका थिए । प्रशासन कार्यालयले माइतीघरदेखि नयाँ बानेश्वरसम्म निषेधित क्षेत्र तोकेको छ । त्यसरी संघीय संसद भवनभित्रै पसेपछि प्रशासनले संसद भवन बानेश्वर, सिंहदरबार र बालुवाटारका पेटीमा हिँड्न निषेध गरी निषेधित क्षेत्र लेखिएको छ । आज ती क्षेत्रका सडक पेटीमा डोरी बाँधेको छ ।