प्रचण्डको ठाडो प्रस्तावमा फेरिए माओवादीका इन्चार्ज

१६ फागुन, काठमाडौं । लामो बहस र विवादपछि नेकपा माओवादी केन्द्रले नेताहरूको कार्य विभाजन गरेको छ । पार्टी अध्यक्ष पुष्पकमल दाहाल प्रचण्डको ठाडो प्रस्तावमा प्रदेशका इन्चार्जहरु पनि फेरिएका छन् । पार्टी केन्द्रीय कार्यालय पेरिसडाँडामा बुधबार बिहान बसेको पार्टी स्थायी समिति बैठकले नेताहरूको कार्य विभाजन गरेको हो । 

मंगलबार बसेको माओवादी स्थायी समिति बैठकले १० प्रदेश इन्चार्ज परिवर्तन गर्ने निर्णय गरेको थियो । अध्यक्ष प्रचण्डको प्रस्तावअनुसार हरिबोल गजुरेल–कोशी र लीलामणि पोखरेल मधेस प्रदेशको इन्चार्ज ताकिएका छन् । अग्नि सापकोटालाई बागमती र दीनानाथ शर्मालाई गण्डकी प्रदेशको इन्चार्ज बनाइएको छ । 

यसैगरी चन्द्रप्रकाश खनाल लुम्बिनी, कालीबहादुर मल्ल कर्णाली, गिरिराजमणि पोखरेल–सुदूरपश्चिम, विशेष प्रदेश इन्चार्जमा हितमान शाक्य चुनिएका छन् । 

सम्पर्क समन्वय कमिटीमा महासचिव समेत रहेका देव गुरुङ, प्रवास अन्तर्गत मध्यपूर्व ब्यूरोको इन्चार्जमा पम्फा भुसाल, भारतमा मातृका यादव र युरोपमा राम कार्कीलाई इन्चार्ज बनाउने निर्णय गरेको सचिव दिनानाथ शर्माले जानकारी दिएका छन् ।