नेपाल एयरलाइन्स सुधारका उपाय खोज्न बनेको समितिले बुझायो प्रतिवेदन

१७ फागुन, काठमाडौं । नेपाल एयरलाइन्सको संरचनागत सुधार अध्ययन समितिले प्रतिवेदन बुझाएको छ । प्रतिवेदन अध्ययन तथा कार्यान्वयन गर्न समिति बनाइएको थियो । यो चौथो प्रतिवेदन हो । 

संस्कृति पर्यटन तथा नागरिक उड्डयन मन्त्रालयले पूर्वगभर्नर दीपेन्द्रबहादुर क्षेत्री नेतृत्वमा समिति बनाएको थियो । सो प्रतिवेदन कार्यान्वयन गर्न पूर्वक्याप्टेन कुलबहादुर लिम्बू नेतृत्वमा समिति बनेको थियो । सो समितिले बिहीबार चौथो प्रतिवेदन बुझाएको हो । 
 
समितिले संस्कृति पर्यटन तथा नागरिक उडड्यनमन्त्री सुदन किराँती, मन्त्रालयका सचिव दीपक काफ्ले र नेपाल वायुसेवा निगमका कार्यकारी अध्यक्ष युवराज अधिकारीलाई संयुक्तरुपमा प्रतिवेदन बुझाएको हो । समितिले बुझाएको प्रतिवेदनमा मुख्य गरी चार वटा बुँदा समावेश गरिएको छ । आन्तरिक लेखा परीक्षण प्रभावकारी बनाउने, सञ्चालक समितिको निर्णय र निगमको सुशासन प्रभावकारी बनाउन लेखा समिति बनाउने सुझाव दिइएको छ ।  

निगमलाई आर्थिक रूपले प्रभावकारी बनाउन सोल्टी होटलको शेयर बिक्री गर्ने र निगमको यथार्थपरक व्यावसायिक कार्ययोजना बनाउने प्रतिवेदनमा उल्लेख गरिएको छ ।