केहीबेर विपक्षी दलको अवरोधपछि संसद सुचारु

१८ फागुन, काठमाडौं । शुक्रबारको प्रतिनिधि सभाको बैठक सुरु भएसँगै विपक्षी दलले उठेर विरोध जनाएका छन । प्रमुख प्रतिपक्षी नेकपा एमालेले प्रधानमन्त्रीको खोजी गर्न माग गर्दै उठेर विरोध जनाएको थियो । 

संसदको शुक्रबार बसेको बैठकको सुरुमै विशेष समय लिएर बोलेका एमाले सांसद सूर्य थापाले सभामुखले रुलिङका बाबजुद प्रधानमन्त्री संसदमा नआएकोमा असन्तुष्टि जनाए । दुग्ध किसान, मिटरब्याजी पीडित, सहकारी पीडित सडकमा आएको भन्दै उनले भने, ‘सम्पूर्ण विषयमा सरकार जवाफदेही भएन, सरकार हरायो । प्रधानमत्री हराउनुभयो । प्रधानमन्त्रीको खोजी गर्नुपर्यो ।’

प्रधानमन्त्रीको खोजी गर्न उच्चस्तरीय समिति बनाउने हो कि संसद स्थगित गर्ने भनेर उनले प्रश्न गरे । सभामुख देवराज घिमिरेले सरकारलाई जवाफ दिन आफूले लिखित रुपमा रुलिङ गराएको जनाएका थिए ।

त्यसपछि सभामुखले २ मिनेटको समय दिएर सांसदहरूलाई बोल्ने समय दिएका छन । अहिले संसद बैठक जारी छ । शून्य समय चलिरहेको छ ।