बेरुजु फछ्र्यौटमा उत्कृष्ट काम गर्ने नौ प्रहरी पुरस्कृत

काठमाडौं । नेपाल प्रहरीले बेरुजु फछ्र्यौटमा उत्कृष्ट काम गर्ने नौ प्रहरी कर्मचारीलाई सम्मानिच भएका छन् । प्रहरी प्रधान कार्यालयमा आज आयोजित कार्यक्रममा प्रहरी महानिरीक्षक सर्वेन्द्र खनालले बेरुजु फछ्र्यौट कार्यमा महत्वपूर्ण भूमिका खेल्ने प्रहरी अधिकृत तथा जवानलाई पुरस्कृत गरेका हुन् ।

यसरी पुरस्कृत र सम्मानित हुनेहरुमा प्रहरी नायब महानिरीक्षक कमलबहादुर जिटी, प्रहरी वरिष्ठ उपरीक्षक दीपक थापा, प्रहरी नायब उपरीक्षकद्वय टेकबहादुर कार्की र मदनकुमार थापा, प्रहरी निरीक्षक मातृकाप्रसाद गुरागार्इं, सुमनकुमार थापा, नवराज सापकोटा, दिनेश तिमल्सेना र प्रहरी जवान फनाधर खनाल रहेका छन् ।

सो अवसरमा प्रहरी महानिरीक्षक खनालले सर्वोकृष्ट काम गरेमा इज्जत र प्रतिष्ठा बढ्ने भएकाले सङ्गठनको कामलाई मर्यादित बनाउन लाग्नुपर्ने बताए । उत्कृष्ट कामको उच्च कदर हुने उल्लेख गर्दै उनले आगामी दिनमा पनि त्रुटिरहित तरिकाले काम गर्नुपर्नेमा जोड दिए।

मन्त्रिस्तरीय निर्णयानुसार बेरुजु फछ्र्यौटमा नेपाल प्रहरी उत्कृष्ट रहेकाले उहाँहरुलाई आज सम्मान गरिएको हो । यसअघि वैशाख ५ गते गृह मन्त्रालयमा आयोजित कार्यक्रममा गृहमन्त्री रामबहादुर थापाले प्रहरी महानिरीक्षक खनाललाई बेरुजु फछ्र्यौटमा उत्कृष्ट काम गरेबापत रु आठ हजार नगदसहित सम्मान गरेका थिए ।