२३ फागुनमा शिव पार्वती रथ यात्रा हुने

२१ फागुन, काठमाडौं ।  फागुन २३ गतेका दिन १४ औं शिव पार्वती रथ यात्रा हुने भएको छ । मानव कल्याण आध्यात्मिक प्रतिष्ठान, केन्द्रीय समिति परिवार र श्री कलममसी कल्पेश्वर महादेब तथा कालिकादेवी मन्दिर विकास समाजको संयुक्त आयोजनामा हुने शिव पार्वती रथ यात्रामा हजारौंको संख्यामा भक्तजनहरू सहभागी हुने भएको हो । 

सो अवसरमा मानव कल्याण आध्यात्मिक प्रतिष्ठानद्धारा आयोजित विशाल शिव पार्वती रथ यात्रा तथा चाँगुनारायण नगरपालिकामा अवस्थीति १०८ फिट अग्लो कल्पेश्वर महादेब स्थापना स्थलमा समापन समारोह हुने भएको हो । सो दिन महामृत्यंजय होम, चिरशान्ति होम, पितृमोक्ष होम, कल्पेश्वर कार्यसिद्धि होम हुने मानव कल्याण आध्यात्मिक प्रतिष्ठानका संरक्षक शिव तान्त्रिक बुद्धिकुमार गुरुले बताएका छन् ।

सहभागी हुन चाहने भक्तजनहरूका लागि फागुन २३ गतेका दिन ललितपुरको बालकुमारी मन्दिरबाट बिहान ८ बजेदेखि बसको सुविधा पनि गरिएको गुरुले बताएका छन् । उनले सो दिन भक्तजनहरूका लागि रथयात्रा बिर्सजन समारोह स्थल कलममसीमा प्रसाद ग्रहणको व्यवस्था पनि गरिएको बताए । मानव कल्याण प्रतिस्थानले भक्तपुरको कलममसीमा १ सय ८ रोपनी क्षेत्रफलमा कल्पेश्वर महादेवको १०८ फिट अग्लो मुर्ति बनाइरहेको छ ।

साथै सो क्षेत्रमा प्रतिष्ठानले बुद्ध, मायावती, बुद्धका ७ पाइला र १ सय ८ आवल ब्रम्हचारी बालागुरु षडानन्दको मुर्ति समेत राखिन लागेको जनाएको छ । खासगरी हिन्दु धर्मावलम्बीहरूलाई धार्मिक प्रेरणा जगाउन र सो क्षेत्रमा धार्मिक पर्यटन प्रवर्द्धन समेत गर्न मुर्ति बनाउन लागिएको प्रतिष्ठानले जनाएको छ । मुर्ति निर्माण कार्य तीव्र रहेको र सोको उद्घाटन आगामी दुई वर्ष भित्रै गरिने गुरुले बताएका छन् ।