बालुवाटारमा शक्ति बाँडफाँट गर्न नयाँ गठबन्धनको बैठक सुरु

२१ फागुन, काठमाडौं । शक्ति बाँडफाँट गर्न नयाँ गठबन्धनको बैठक फेरि सुरु भएको छ । बालुवाटार बैठकमा नेकपा 'माओवादी केन्द्र'का अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’, नेकपा 'एमाले'का अध्यक्ष केपी शर्मा ओली, राष्ट्रिय स्वतन्त्र पार्टी 'रास्वपा'का सभापति रवि लामिछाने, जनता समाजवादी पार्टी 'जसपा'का अध्यक्ष उपेन्द्र यादव लगायतका नेताहरू सहभागी छन् । 

मन्त्री लगायतका विषयमा भागबन्डा गर्न दलहरू फेरि बैठकमा जुटेका हुन् । आज बिहान पनि बालुवाटारमा छलफल भएको थियो । आजै तीन मन्त्रीको शपथको तयारी छ ।

यसअघि मन्त्री बाँडफाँट लगायतका मुख्य शक्ति भागबन्डाका लागि चारवटै दलका नेताहरू सम्मिलित कार्यदलले भागबन्डाको खाका तयार पार्न जिम्मा दिएको थियो । 

जसमा एमालेका उपाध्यक्ष समेत रहेका विष्णु पौडेल, माओवादीका उपमहासचिव वर्षमान पुन, रास्वपाका सभापति रवि लामिछाने र जसपा अध्यक्ष उपेन्द्र यादव रहेका थिए । नेताहरूबिच सोमबार बिहान भएको सहमतिअनुसार एमाले, रास्वपा र माओवादीबाट एक–एक मन्त्रीले आजै शपथ खाँदैछन् ।