राजनीतिमा गठबन्धन बन्नु, तोडिनु र फेरि बन्नु सामान्य हो तर हिजोको घटना सामान्य होइन : डा. शेखर कोइराला

२२ फागुन, काठमाडाैं । नेपाली कांग्रेसका वरिष्ठ नेता नेता डा. शेखर कोइरालाले सत्ताका लागि जे पनि गर्ने पार्टीसँगको गठबन्धन कांग्रेसका लागि महँगो परेको टिप्पणी गरेका छन्। नेकपा 'माओवादी केन्द्र' ले कांग्रेससँग सहकार्य सोमबारदेखि तोडेर नयाँ समीकरण बनाएको थियो।

‘राजनीतिमा गठबन्धन बन्नु, तोडिनु र फेरि बन्नु सामान्य हो तर हिजोको घटना सामान्य होइन,’ मंगलबार बिहान उनले सामाजिक सञ्जाल फेसबुकमा लेखेका छन् ।  उनले प्रधानमन्त्री प्रचण्ड अस्थिर, माओवादी कमजोर र सत्ताको लागि जे पनि गर्न तयार पार्टी भएकोले कांग्रेसलाई महँगो परेको बताएका छन् ।

सत्ता गठबन्धन तोडिनुमा कांग्रेस नेताकै व्यक्तिगत हठ पनि केही हदसम्म जिम्मेवार भएको हो कि भन्ने आशङ्का उनले गरेका छन् । ‘यस घटनामा कतै हाम्रा व्यक्तिगत हठ पनि केही हदसम्म जिम्मेवार भए कि ? भविष्यको लागि सजग बनौँ,’ उनले भनेका छन् ।

सत्ता गठबन्धन भत्किनुको आधिकारिक धारणा भने कांग्रेसले आजको कार्यसम्पादन समितिको बैठकपछि मात्रै सार्वजनिक गर्ने बताएको छ ।