बालुवाटारमा नयाँ गठबन्धनको बैठक छाडेर प्रचण्ड र ओली माधवको साथ खोज्न कोटेश्वर पुगे

२२ फागुन, काठमाडौं । बालुवाटारमा नयाँ गठबन्धनको बैठक जारी भइरहेका बेला नेकपा (एकीकृत समाजवादी) का अध्यक्ष माधवकुमार नेपाललाई भेट्न प्रधानमन्त्री पुष्पकमल दाहाल ‘प्रचण्ड’ र नेकपा एमालेका अध्यक्ष केपी ओली कोटेश्वर गएका छन् ।

एकीकृत समाजवादीलाई पनि नयाँ सत्ता गठबन्धनमा सामेल गराउन आग्रह गरिरहेका प्रधानमन्त्री प्रचण्ड र अध्यक्ष ओलीले नेपालसँग भेटेरै यसबारे कुरा गर्न लागेका हुन् ।

स्रोतका अनुसार प्रधानमन्त्री र ओलीले नेपालजीलाई भेटेर कुरा गरेपछि मात्र मन्त्रालय भागबन्डाबारे छलफल अघि बढे भएको छ । नयाँ समीकरण बनेसँगै सरकारमा एकीकृत समाजवादीलाई समेट्न प्रधानमन्त्री प्रचण्ड र ओलीले माधवको साथ खोजेका हुन् ।

सोमबार साँझ पनि नयाँ मन्त्रीहरूले शपथ लिएपछि प्रधानमन्त्री प्रचण्ड र माओवादी केन्द्रका वरिष्ठ उपाध्यक्ष नारायणकाजी श्रेष्ठ एकीकृत समाजवादीका अध्यक्ष नेपाललाई भेट्न उनकै निवास कोटेश्वर पुगेका थिए ।  स्रोतका अनुसार ओलीले अध्यक्ष नेपाललाई फोन गरेर मिलेर जान प्रस्ताव गरेका थिए। त्यसको आधा घन्टापछि प्रधानमन्त्री दाहाल र माओवादी केन्द्रका वरिष्ठ उपाध्यक्ष नारायणकाजी श्रेष्ठ कोटेश्वर पुगेका थिए।

गठबन्धनमा सहभागी हुने या नहुने भन्नेमा छलफल गर्न एकीकृत समाजवादीको सचिवालय बैठक बुधबार बिहान ११ बजेका लागि बोलाइएको छ।