नेपाल निवासमा किन गए कांग्रेस सभापति देउवा ?

२३ फागुन, काठमाडौं । सत्ता राजनीतिमा चरम चलखेल भइरहेका बेला नेपाली कांग्रेसका सभापति शेरबहादुर देउवा नेकपा एकीकृत समाजवादीका अध्यक्ष माधवकुमार नेपाललाई भेट्न उनको निवास कोटेश्वर पुगेका छन् । उनी बुधबार बिहान कोटेश्वर पुगेको बताइएको छ ।  

समाजवादीका अध्यक्षसमेत रहेका नेता नेपाललाई भेट गर्न देउवा उनकै निवासमा पुगेको कांग्रेसका  एक नेताले नेपालबहसलाई जानकारी दिए । देउवा कोटेश्वर जानुको कारण सामान्य राजनीतिक छलफल भएको उनको भनाइ छ । माओवादीका अध्यक्ष पुष्पकमल दाहाल प्रचण्डले गठबन्धन तोडेपछि कांग्रेस सत्ताबाहिर पुगेको छ ।  

यसअघि मंगलबार बेलुका नेपाल निवास कोटेश्वरमा प्रधानमन्त्री पुष्पकमल दाहाल, एमाले अध्यक्ष केपी शर्मा ओली पुगेका थिए । त्यसलगत्तै राप्रपाका अध्यक्ष राजेन्द्र लिङ्देन र रवि लामिछाने पनि पुगेका थिए । नेपाल सत्ता पक्ष र विपक्षको केन्द्रविन्दुमा छन् ।