माधव नेपाललाई कांग्रेसले गर्‍यो प्रधानमन्त्रीको अफर

२३ फागुन, काठमाडाैं । सत्ता गठबन्धनबाट धकेलिएको नेपाली कांग्रेसले नेकपा एकीकृत समाजवादी 'एस' पार्टीका अध्यक्ष माधव कुमार नेपाललाई प्रधानमन्त्री पदको अफर गरेको छ ।

मंगलबार साँझ कांग्रेस सभापति शेरबहादुर देउवाले नेपाललाई फोन गरेर बुधबार आज बिहान भेट्न आउने बताएका थिए । स्रोतका अनुसार सभापति देउवा नेपाललाई भेट्न आज बिहान नेपाल निवास कोटेश्वर पुगेका हुन् । भेटमा नेपाललाई प्रधानमन्त्री बन्न देउवाले प्रस्ताव गरेका छन्, स्रोतले भन्यो । 

कांग्रेस सभापति देउवासँगै नेपाल निवासमा देउवा पत्नी आरजु राणा र नेता रमेश लेखकबीच पछिल्लो राजनीतिक अवस्थाको विषयमा छलफल भएको छ ।

कांग्रेसले हिजो मंगलबार मात्र पनि राष्ट्रिय स्वतन्त्र पार्टीका सभापति रवि लामिछानेलाई प्रधानमन्त्री पदको अफर गरेको थियो । यसैगरी राप्रपा अध्यक्ष राजेन्द्र लिङदेनलाई पनि अघिल्लो वर्ष प्रधानमन्त्री प्रस्ताव गरेको थियो ।  

तर यसपटक पनि कांग्रेसले गठबन्धन भत्काउन र बहुमत पुग्न नदिन नेपाललाई सो प्रस्ताव अनौपचारिक रुपमा राखेको हो ।