मधेश सरकार सुनिश्चित नभएसम्म जसपाले केन्द्रको निर्णय नगर्ने

२३ फागुन, काठमाडाैं । जनता समाजवादी पार्टी (जसपा)ले मधेस प्रदेश सरकारको नेतृत्वको सुनिश्चित नभएसम्म केन्द्रसरकारमा नजाने निर्णय गरेको छ । आजको बैठक मन्त्री छनोट नगरी सकिएको छ । सोमबारदेखि लगातार बुधबारसम्म बसेको बैठकमा सरकारमा पठाउने मन्त्रीका विषयमा कुनै निर्णय नभएको बताइएको छ ।  

बैठकले सङ्घीय सरकारमा सहभागी हुनका लागि मधेस प्रदेशको सरकारलाई बटमलाइन बनाएको हो । आजको बैठकमा मन्त्रिपरिषद्‍मा पठाउने नेताको नाम चयन गर्नुभन्दा पहिले मधेश प्रदेशको सरकार र संघीय सरकारमा पार्टीले पाउने मन्त्रालयको टुंगो लागेपछि मात्रै सरकारमा सहभागी हुने बारेमा अन्तिम निर्णय गर्नुपर्ने सुझाव नेताहरुले दिएका छन् ।

त्यसपछि कुनै निर्णय नगरिकन अध्यक्ष यादव, नेताहरु राजेन्द्र श्रेष्ठ, मनिष सुमन र रकम चेम्जोङ छलफलका लागि प्रधानमन्त्री पुष्पकमल दाहाल प्रचण्डको सरकारी निवास बालुवाटार गएको स्रोतको दाबी छ । 

बैठकमा अधिकांश सांसद र कार्यकारिणी सदस्यले अहिलेकै परिस्थितिमा सरकारमा सहभागी हुन नहुने धारणा राखेका छन् । आज बसेको जसपा कार्यकारिणी समिति बैठक पुनः बस्ने गरी सकिएको छ ।