सरकारलाई दिएको समर्थन फिर्ता लिँदै कांग्रेसले भन्यो, ‘प्रचण्डले विश्वसाघाती राजनीति गरे’

२४ फागुन, काठमाडौं । नेपाली कांग्रेसले नेकपा माओवादीका अध्यक्ष एवं प्रधानमन्त्री पुष्पकमल दाहाल 'प्रचण्ड' नेपाली राजनीतिको विश्वासघाती नेता भएको बताएको छ । कांग्रेस संसदीय दलले प्रधानमन्त्री प्रचण्ड राजनीतिक बेइमानी गर्ने व्यक्ति भएको आरोप पनि लगाएको छ ।

प्रधानमन्त्री प्रचण्डले कांग्रेस छेडेर गठबन्धन बदलेपछि बिहीबार बसेको संसदीय दलको बैठकले सरकारलाई दिएको समर्थन फिर्ता लिएको सभामुखलाई जानकारी गराउने निर्णय गरेको छ । संविधानको रक्षा, गणतन्त्रात्मक व्यवस्थाको सुदृढीकरण, सुशासन विकास र स्थिरताका लागि गठबन्धन गरेर चुनावमा गएको र त्यसक्रममा भएको सहमतिप्रति आफू प्रतिबद्ध रहेको बेला प्रधानमन्त्रीले अविश्वसनीय ढंगले गठबन्धन तोडेको कांग्रेसको निष्कर्ष छ ।

कांग्रेसका प्रमुख सचेतक रमेश लेखकले प्रचण्डको कदमलाई हामीले विश्वासघाती र राजनीतिक बेइमानी ठहर गरेको बताए । उनले गठबन्धनको संस्कृति, मूल्यमान्यता र सम्पूर्ण सहमतिलाई पालना गरि राखेकै अवस्थामा अविश्वसनीय ढंगले गठबन्धन भत्काउने जुन कामलाई कुनै हिसाबले राजनीतिक इमान्दारी हुन नसक्ने बताए । 

गठबन्धन तोडेर प्रधानमन्त्रीले देशलाई अस्थिरता र अनिश्चिततातर्फ लगेको कांग्रेसको आरोप छ । संघीय संसदमा प्रमुख विपक्षी दलका हैसियतले रचनात्मक प्रतिपक्षको भूमिका निर्वाह गर्ने कांग्रेसले बताएको छ । ‘हामीले हाम्रा सांसदहरुलाई संसदमा देश जनताका हितमा प्रभावकारी रुपमा प्रस्तुत हुन र रचनात्मक प्रतिपक्षको भूमिका निर्वाह गर्न निर्देश गरेका छौं,’ प्रमुख सचेतक लेखकले भने ।