सत्ता समीकरणसँगै प्रतिनिधिसभाका आसनमा फेरबदल

२४ फागुन, काठमाडौं । प्रतिनिधिसभाको आसन फेरिएको छ । सत्ता समीकरण फेरिएसँगै प्रतिनिधिसभाको बैठकमा दलहरूको आसन पनि बदलिएको हो । नेपाली कांग्रेस प्रमुख प्रतिपक्षी बेन्चमा सरेको छ भने नेकपा एमाले सत्ता पक्षको बेन्चमा सरेको छ । 

प्रधानमन्त्री पुष्पकमल दाहाल प्रचण्डले नेपाली कांग्रेसलगायत दलसहितको सहकार्य तोडेर नेकपा एमालेसहितको गठबन्धन बनाएपछि आसन फेरिएको हो ।  यसअघि प्रमुख प्रतिपक्षमा रहँदै आएको एमाले सत्तापक्ष भएको छ । प्रतिपक्षी राष्ट्रिय स्वतन्त्र पार्टी (रास्वपा) पनि सत्तापक्ष भएको छ ।

यसअघि सत्तापक्षमा रहँदै आएको कांग्रेस प्रमुख प्रतिपक्ष दल बनेको छ । यसअघि सरकारमा रहेका अरू दलहरूको आसन पनि फेरिएको छ । यसअघि सत्तापक्षमा रहेको नेकपा एकीकृत समाजवादी, जनता समाजवादी पार्टी (जसपा) भने सत्तापक्षमै छन् ।

संसद सचिवालयका अनुसार बिहीबारको प्रतिनिधि सभा बैठकमा नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा), एकीकृत समाजवादी र नागरिक उन्मुक्ति पार्टी (नाउपा) सत्तापक्षको बेन्चमा बसेका छन् ।

एमालेका ७८, माओवादी केन्द्रका ३२, रास्वपाका २१, जसपाका १२, एकीकृत समाजवादीका १० र नाउपाका ४ जना सांसद छन् । उनीहरू सत्ता पक्षमा बसेका छन् ।