संसदमा गिरिजाप्रसाद कोइरालाबारे माओवादीको बखान

२४ फागुन, काठमाडौं । नेकपा माओवादीले गिरिजाप्रसाद कोइरालाको बखान गरेर आफूलाई चोख्याउने प्रयास गरेको छ । माओवादीका अध्यक्ष एवं प्रधानमन्त्री पुष्पकमल दाहाल प्रचण्डले कोइरालाको निर्देशनलाई अनुसरण गरिरहेको उसको भनाइ छ । 

माओवादीका सचिव देवेन्द्र पौडेलले प्रधानमन्त्री प्रचण्डलाई कांग्रेसले राजनीतिक बेइमान भनी गरेको टिप्पणीको खण्डन गर्दै कोइरालाको स्मरण गरे । उनले सत्ता गठबन्धन तोडेर एमालेसँग नयाँ गठबन्धन बनाएपछि कांग्रेसले प्रचण्डलाई राजनीतिक बेइमान भनी टिप्पणी गरेको प्रति उनले आपत्ति जनाए । 

बिहीबार प्रतिनिधि सभाको विशेष समयमा बोल्दै माओवादी सांसद पौडेलले कांग्रेसले गरेको टिप्पणीको खण्डन गर्दै कांग्रेसकै नेता गिरिजाप्रसाद कोइरालालाई स्मरण गर्दै गिरिजा प्रसाद कोइरालालाई सबैले सम्मान गर्ने र कांग्रेसले भन्दा आफूहरूले बढी सम्मान गर्ने बताए ।

माओवादी सचिव पौडेलले थपे, ‘गिरिजा प्रसाद कोइरालाले ठिकै व्यक्ति छान्नुभएछ । अब यो देश सबै हिसाबले तपाईंले सम्हाल्नु होला भनेर कमरेड प्रचण्डलाई जिम्मा लगाएको कुरा साँचो हो ।’

प्रधानमन्त्री प्रचण्डले आफू बाँचुन्जेल उथलपुथल हुन्छ भनी दिएको सार्वजनिक अभिव्यक्तिको बचाउ गर्दै उनले भने, ‘कोही पनि आतंकित हुन जरुरी छैन । गिरिजाप्रसाद कोइरालाले दिएको जिम्मेवारी प्रधानमन्त्रीले पूरा गर्दै हुनुहुन्छ ।’