युएई हिँडेका तीन महिला फर्काइए, एजेन्ट हिरासतमा

२५ फागुन, काठमाडौं । भिजिट भिसामा यूएई जान लागेको अवस्थामा विमानस्थल प्रहरीले ३ जना महिलालाई विमानस्थलबाट फर्काएको छ । त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख एसएसपी कृष्णहरि शर्माका अनुसार सोधपुछपछि शंकास्पद देखिएकाले एजेन्टलाई बोलाएर उनीहरुलाई फर्काइएको हो । 

एजेन्ट भविलाल थापालाई प्रहरीले हिरासतमा राखेर सोधपुछ सुरु गरेको छ । भिजिट भिसामा जान लागेका तेह्रथुमकी नेत्रकुमारी गुरुङ, अर्घाखाँचीकी हरि उपाध्याय, चितवनका दुर्गा श्रेष्ठलाई भने फिर्ता पठाइएको छ । एजेन्टको मोबाइलबाट विगतमा पनि उनले पैसा उठाएर भिजिट भिसामा पठाउने गरेको प्रमाणहरू भेटिएको प्रहरीले जनाएको छ । 

केही समय अघि भिजिट भिसामा नेपालीलाई पैसा उठाएर विदेश पठाउने गरेको अभियोगमा अध्यागमनका नौ अधिकृतसहितलाई प्रहरीले मुद्दा चलाएको थियो । सोधपुछका क्रममा शंकास्पद रुपमा यूएई पठाउन लागेको खुलेपछि फर्काइएको हो । 

पक्राउ परेका थापालाई थप अनुसन्धानका लागि उपत्यका अपराध अनुसन्धान कार्यालय पठाइएको छ । प्रहरीका अनुसार, भिजिट भिसामा नेपालीलाई विदेश पठाउने गिरोह नै सक्रिय छ । सजिलै काम पाइने प्रलोभनमा विदेश लगेर अलपत्र पार्न गरिएको भेटिएपछि प्रहरी जाँचमा कडाइ गरेको छ ।

रसियन सेनामा जाने कतिपय नेपालीलाई पनि एजेन्टले भिजिट भिसामा दुबई लगेर त्यहाँबाट मस्को पठाएको अनुसन्धानबाट देखिएको थियो । घरेलु कामदारको रुपमा काममा लगाउन प्रतिव्यक्ति २ लाख रुपैयाँ लिएर एजेन्टले दुबई पठाउन लागेका थिए ।