पाँच पार्टीका नेता राखेर न्युनतम साझा कार्यक्रम बनाउन संयन्त्र गठन

२७ फागुन, काठमाडौं । सरकारको न्यूनतम् साझा कार्यक्रम बनाउन सत्ता गठबन्धन दलहरूबीच छलफल गरी संयन्त्र बनाएको छ । आइतबार बिहान सिंहदरबार स्थित अर्थ मन्त्रालयमा भएको छलफलमा न्यूनतम् कार्यक्रम बनाउने बारेमा छलफल भएको थियो । 

छिटो न्यूनतम् साझा कार्यक्रम बनाउने र सो कार्यक्रम गठबन्धनका बीचमा भएको ८ बुँदे राजनीतिक सहमतिमा आधारित हुने बताइएको छ । सरकारका प्राथमिकता तय गर्न सत्ता गठबन्धनले दश सदस्यीय राजनीतिक संयन्त्र गठन गरेको हो । सत्तामा सहभागी पाँच दलबाट २/२ हुने गरी संयन्त्र बनाइएको छ ।

नेकपा एमालेबाट उपाध्यक्ष विष्णु पौडेल र विष्णु रिमाल, माओेवादी केन्द्रबाट वर्षमान पुन र जनार्दन शर्मा, राष्ट्रिय स्वतन्त्र पार्टीबाट स्वर्णिम वाग्ले र मुकुल ढकाल, जनता समाजवादीबाट मनिष सुमन र राजेन्द्र श्रेष्ठ, एकीकृत समाजवादीबाट घनश्याम भुसाल र प्रमेश हमाल सम्मिलित राजनीतिक संयन्त्र गठन गरिएको छ ।

पाँच वटै पार्टीबाट आएका धारणा समेटेर मस्यौदा तयार गर्न रिमाललाई जिम्मेवारी दिइएको छ । सरकारका कार्यलाई प्रभावकारी बनाउन प्राथमिकता विषयहरू समेटेर कार्यदलले प्रतिवेदन तयार गर्ने बताइएको छ । अघिल्लो पुस १० मा बनेको सरकारले तयार गरेको न्यूनतम् साझा कार्यक्रमहरू र हालको समय अनुसार परिमार्जित प्रतिवेदन तयार हुने संयन्त्रले जनाएको छ । बैठक मंगलबार पुन बस्ने भएको छ ।