पाण्डेविरुद्ध श्रेष्ठले उजुरी दिएपछि प्रहरीले थाल्यो छानविन

२८ फागुन, काठमाडौं । राष्ट्रिय प्रजातन्त्र पार्टी (राप्रपा) का नेता ठाकुरमोहन श्रेष्ठमाथि हातपात भएको घटनामा प्रहरीले अनुसन्धान सुरु गरेको छ । पार्टी कार्यालयभित्रै सांघातिक आक्रमणमा परेका राप्रपा कार्यसम्पादन समिति सदस्य पूर्वएआईजी ठाकुरमोहन श्रेष्ठले प्रहरीमा जाहेरी दिएका थिए । 

पार्टी उपाध्यक्ष विक्रम पाण्डेको योजनामा आफूमाथि आक्रमण गरिएको उनको जाहेरीमा उल्लेख छ । राप्रपा कार्यसम्पादन समितिको बिहानको बैठकपछि खाना खान निस्कने क्रममा ठाकुरमोहन आक्रमणमा परेका थिए । आक्रमणको पछिल्लो दृष्य सञ्चारमाध्यम लाइभमा समेत कैद भएको थियो । 

सो घटनाका विषयमा जिल्ला प्रहरी परिसर काठमाडौंको टोलीले अनुसन्धान थालेको छ । घटनाबारे नेता श्रेष्ठले निवेदन दिएपछि प्रहरीले अनुसन्धान थालेको हो । काठमाडौं प्रहरीका एसपी नवराज अधिकारीले घटनाको अनुसन्धान अघि बढाइएको जानकारी दिए । घटनामा संलग्नको खोजी गरिरहेको उनले बताए ।