लिखित सहमति नभए नेकपा एसले राष्ट्रिय सभामा माओवादीका उम्मेदवारलाई भोट नदिने

२८ फागुन, काठमाडौं । सत्ता सहयात्री दल नेकपा एकीकृत समाजवादीले राष्ट्रिय सभा अध्यक्षमा माओवादीका उम्मेदवारलाई मत दिन लिखित सहमति मागेको छ । प्रधानमन्त्री पुष्पकमल दाहाल प्रचण्डले आफ्नो पार्टीले अघि सारेका मागहरूमा लिखित सहमति जनाए मात्रै राष्ट्रिय सभामा र विश्वासको मत दिने बताएको छ ।

सोमवार सिंहदरबारमा बसेको पार्टीको संसदीय दलको बैठकले सो निर्णय गरेको हो । पार्टीका प्रमुख सचेतक मेटमणि चौधरीले राष्ट्रिय सभा अध्यक्षमा पनि प्रधानमन्त्रीलाई आफ्नो पार्टीले भनेका कुराहरूमा लिखित सहमति जनाए मात्रै आफ्नो पार्टीले मत दिने बताए ।

उनले आफ्नो पार्टीले प्रधानमन्त्रीलाई भनेका केही मागहरूको सुनुवाइ नभए भोट हालिरहनु पर्ने जरुरी नरहेको बताए । उनले भने, ‘हामीले भनेको केही कुरामा उहाँले सहमति जनाउनुभयो भने त्यो पनि लिखित सहमति गर्नुभयो भने राष्ट्रिय सभामा भोट दिन सक्छौँ । र प्रतिनिधि सभामा उहाँले लिने विश्वासको मतमा पोजिटिभ हुनसक्छौँ । तर उहाँले हाम्रा कुरा सुनुवाइ नगर्ने र हामीले भोट हाल्दिरहनु पर्ने जरुरी ठानेका छैनौँ, ठान्दैनौँ ।’

उनले सरकारले अघि बढ्ने की ढल्ने भन्ने कुरा प्रधानमन्त्री दाहालमै निर्भर रहेको बताए । उनले सरकार ढल्ने वा रहने कुरा प्रचण्डमै भर पर्ने र सहमत गरे मत पाउने र नगरे मत नपाउने बताए ।