सहकारी ठगी प्रकरणः सरकारमा पीडक, सडकमा पीडित

१ चैत्र, काठमाडौं । नयाँ गठबन्धन बनेर राष्ट्रिय स्वतन्त्र पार्टीका सभापति रवि लामिछाने गृहमन्त्री बन्ने हल्ला चल्दै गर्दा सहकारी पीडितहरु आन्दोलनको तयारी गर्दै थिए । लामिछाने उपप्रधानसहित गृहमन्त्री बनेपछि सहकारी बचतकर्ता संरक्षण राष्ट्रिय अभियानले देशभरबाट पीडितलाई काठमाडौंमा जम्मा गरेर निर्णायक प्रदर्शन गर्ने तयारी गर्यो । 

महासंघका अध्यक्ष कुशल केसीले सञ्चारमाध्यमलाई दिएको जानकारी अनुसार आज उनीहरुले काठमाडौंमा वृहत् प्रदर्शन गर्ने भन्दै जम्मा भएका छन् । सरकार समक्ष राखेका माग आज सम्बोधन नभए सबै पीडितहरु सहकारी विभागमा गएर धर्ना बस्ने उनीहरुको चेतावनी छ । 

सहकारीको बचत हिनामिना गरेर सर्वसाधारण ठगीमा मुछिएका रास्वपा सभापति रवि लामिछानेलाई उपप्रधान तथा गृहमन्त्री बनाइएकामा प्रतिनिधिसभा बैठकमा पनि प्रश्न उठेको छ । बुधबारको बैठकमा सत्तारुढ बाहेकका दलले प्रश्न उठाए । यो विषयलाई सहकारी पीडितहरुले पनि नोटिस गरेका छन् । 

प्रमुख प्रतिपक्ष कांग्रेस र अन्य दलका सांसदले विगतमा विवादित मन्त्रीको उदाहरण दिँदै सहकारी ठगीका व्यक्ति पनि मन्त्रिपरिषदमा रहन नहुने भन्दै सरकारको ध्यानाकर्षण गराए । कांग्रेसले यस विषयलाई प्रमुख मुद्दा बनाउने र प्रधानमन्त्रीको जवाफ नआए सहज रूपमा संसद् चल्न नदिने चेतावनीसमेत दिइसकेको छ । 

बुधबार संसदमा प्रश्न उठ्यो, आज बिहीबार सडकबाट प्रश्न उठाइँदैछ । सहकारी पीडितहरुले आज काठमाडौं उपत्यकामा प्रदर्शन सुरु गरिसकेका छन् । उनीहरुले काठमाडौंका विभिन्न स्थानबाट जुलुस निकालेर भृकुटी मण्डपमा एकीकृत सभा गर्ने जानकारी दिएका छन् । सरकारी पीडितहरुले काठमाडौं उपत्यकाको सवारी आवागमन अवरुद्ध हुनसक्ने जानकारी पहिले नै गराएका छन् । 

उनीहरू देशका विभिन्न स्थानबाट राजधानीमा भेला भएका हुन् । पीडितहरुले विभिन्न पाँच केन्द्रविन्दुबाट प्रदर्शन गर्दै भृकुटीमण्डपमा जम्मा भएर सभा गर्ने कार्यक्रम तय भएको जानकारी दिएका छन् । प्रदर्शन गर्नका लागि कालिमाटी, गोंगबु नयाँ बसपार्क नजिकको बिजी मल, शंखपार्क, सिफल चौर र जावलाखेल केन्द्रविन्दु तोकिएको छ । ती पाँच स्थानबाट बिहान ११ बजे पैदल मार्च सुरु भइसकेको भन्दै पीडितहरु सुन्धारामा भेला हुँदैछन् । सबै टोली सुन्धारामा भेला भएर भृकुटीमण्डप पुग्ने र कोणसभा गर्ने कार्यक्रम तय भएको छ ।

सहकारीमा भएको ठगीलाई लिएर गृहमन्त्री नहुँदै रवि लामिछाने र ग्यालेक्सी टेलिभिजनको सञ्चालक संस्था गोरखा मिडिया नेटवर्कका अध्यक्ष गीतेन्द्र राई (जीबी) विरुद्ध उजुरी परेको छ । सहकारी विभागमा उनीहरू विरुद्ध नेपाली नागरिकका तर्फबाट युवराज सफलले २ माघमा उजुरी दिएका थिए । 

उनले लामिछाने र राई सहकारी ठगीमा मुछिएको उल्लेख गरेका छन् । विभिन्न सहकारीको रकम गैरकानुनी ढंगबाट टेलिभिजनमा लगानी गरी हिनामिना गरेको भन्दै उनीहरूमाथि हदैसम्मको कानुनी कारबाहीको माग गर्दै उनले उजुरी दिएका हुन् । यसको छानविन भइरहेको छ । 

यस्तै सूर्य दर्शन सहकारीको ठगी प्रकरण सम्बन्धी मुद्दा जिल्ला अदालत, कास्कीमा विचाराधीन छ । यसअघि गत भदौमा प्रहरीमा उजुरी परेको थियो । प्रहरीले अनुसन्धान गरेर जिल्ला सरकारी वकिलको कार्यालयमार्फत अदालतमा मुद्दा दायर गरेको थियो ।

त्यति वेला सहकारीका अध्यक्ष थानबहादुर बुढा मगर, पूर्व अध्यक्षहरू गितेन्द्रबाबु राई (जीबी) र भूपेन्द्र राई लगायतलाई विपक्षी बनाइएको थियो । उनीहरू मध्ये कोषाध्यक्ष कुमार रम्तेल, उपाध्यक्ष कैलाशकुमार दर्लामी, सदस्यहरू महेन्द्र भाेटे भनिने शिवबहादुर गुरुङ र भगीश्वर अर्याल पक्राउ परेका थिए । उनीहरूलाई जिल्ला अदालतले पुर्पक्षका लागि थुनामा पठाउन आदेश दिएको थियो ।

पूर्व अध्यक्ष जीबी राई फरार छन् । उनी विरुद्ध प्रहरीले डिफ्युजन नोटिस जारी गरिसकेको छ । जीबी राई अध्यक्ष रहेको ग्यालेक्सी टेलिभिजनमा सूर्यदर्शन सहकारीको रकम लगानी गरिएको आरोप छ । ग्यालेक्सी टेलिभिजन सञ्चालन गर्दा रवि लामिछाने प्रबन्ध निर्देशक थिए । त्यसै आधारमा उनीमाथि पनि छानबिनको माग गरी पीडितहरूले उजुरी दिएका छन् । 

रवि लामिछाने अहिले उपप्रधान एवं गृहमन्त्री छन् । दीपेश पुन माओवादी केन्द्र निकट विद्यार्थी संगठनका नेता हुन् । २५ जना पीडितले थप एउटा जाहेरी ल्याएको जिल्ला प्रहरी कार्यालय कास्कीले जनाएको छ । उनै लामिछानेलाई लक्षित गर्दै आन्दोलन सुरु गरेका छन् ।