न्यूनतम साझा कार्यक्रमको मस्यौदा तयार, शीर्ष नेतालाई बुझाइँदै

२ चैत, काठमाडौं । सरकारको न्यूनतम् साझा कार्यक्रमको मस्यौदा तयार भएको छ । शुक्रवार बसेको कार्यदलको बैठकले सरकारको न्यूनतम् साझा नीति तथा कार्यक्रमको मस्यौदा तयार पारेको हो । एमालेका उपाध्यक्ष तथा कार्यदलका संयोजक विष्णुप्रसाद पौडेलले जानकारी दिए । कार्यदलले तयार पारेको सरकारको न्यूनतम् साझा नीति तथा कार्यक्रमको मस्यौदा आज नै शीर्ष नेताहरूलाई बुझाउने तयारी छ । 

साझा कार्यक्रममा संविधानको रक्षा, आर्थिक विकास र समृद्धि,अर्थतन्त्रका चुनौती समाधान, आम मानिसहरूमा आशा र विश्वास जगाउने,सार्वभौम सत्ता र स्वाधीनताको रक्षा गर्ने विषयलाई प्राथमिकता दिइएको पौडेलले बताए । राष्ट्रलाई समृद्ध बनाउने,जनतालाई सुखी बनाउने,समृद्ध राष्ट्र सुखी नेपालको आकांक्षा पूरा गर्ने र देशलाई समाजवादतर्फ अगाडि बढाउने विषय पनि समावेश गरिएको उनको भनाइ छ । 

कार्यदलमा नेकपा एमालेबाट उपाध्यक्ष विष्णु पौडेल र उपमहासचिव विष्णु रिमाल, माओवादीबाट उपमहासचिवद्वय वर्षमान पुन र जनार्दन शर्मा, रास्वपाबाट उपसभापति डा. स्वर्णिम वाग्ले र महासचिव मुकुल ढकाल, नेकपा एकीकृत समाजवादीबाट उपाध्यक्ष प्रमेश हमाल र महासचिव घनश्याम भुसाल र जसपाबाट नेताद्वय राजेन्द्र श्रेष्ठ र मनिष सुमन सदस्य छन् ।