हुण्डी कारोबारमा संलग्न चार जना वीरगञ्जबाट पक्राउ

२ चैत, वीरगञ्ज । वीरगञ्जमा हुण्डीको कारोबारमा संलग्न रहेको आरोपमा प्रहरीले ४ जनालाई वीरगन्जको आदर्शनगरबाट पक्राउ गरेको छ । पक्राउ पर्नेमा वीरगन्ज महानगरपालिका वडा नम्बर १० का ३२ बर्षिय कुनाल जयसवाल,वडा नम्बर २२ का ३९ बर्षिय वीरेन्द्र साह तेली,२० बर्षिया रेखा कुमारी साह र पर्साको जगरनाथपुर गाँउपालिका वडा नम्बर ६ का २५ बर्षिय मितु कुमार कुर्मी रहेका छन्।

पर्साका प्रहरी उपरीक्षक कुमोद ढुंगेलका अनुसार, वीरगन्ज १० आदर्शनगरस्थित कुनाल जयसवालको किराना पसलबाट उनिहरुलाई प्रहरीले बिहीबार नियन्त्रणमा लिएको हो।

जयसवालको किराना पसलबाट प्रहरीले नगद चार लाख तीन हजार नेपाली रुपैयाँ, विभिन्न बैंकको चेकबुक १३ थान,विभिन्न मितिमा काटिएको चेक ६६ थान,नबिल बैंक,एनआइसी एशिया र नेपाल राष्ट्र बैंकमा गरी ३१ लाख भन्दा बढी रकम जम्मा गरिएको डिपोजिट स्लीप पाँच थान,एटीएम कार्ड तीन थान र मोबाइल फोन सात थान बरामद गरिएको प्रहरी  उपरीक्षक ढुंगेलले जानकारी दिए।

पक्राउ परेकाहरु विरुद्ध बैंक तथा वित्तीय संस्था सम्बन्धि ऐन २०७३ विरुद्धको कसुरमा मुद्दा दर्ता गरी पर्सा जिल्ला अदालतबाट पाँच दिनको म्याद अनुमति लिई अनुसन्धान भइरहेको ढुंगेलले जानकारी दिए।