सीआईबीले बुझ्यो सुन तस्करीसम्बन्धी आयोगको प्रतिवेदन

४ चैत, काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी) ले सुन तस्करीसम्बन्धी अनुसन्धान गर्ने गठित उच्चस्तरीय जाँचबुझ आयोगको प्रतिवेदन बुझेको छ । सीआईबीले आइतबार गृह मन्त्रालयमा प्रतिवेदन बुझेको हो । 

आइतबार प्रतिवेदन बुझेपछि यसको अध्ययन गरेर आयोगले कारवाहीको सिफारिस गरेका माथि सीआईबीले थप अनुसन्धान र कारवाही गर्नेछ । अब अध्ययन गरेपछि कारबाही प्रक्रिया अघि बढाउने सीआईबीको तयारी छ । 

त्रिभुवन विमानस्थलबाट बरामद भएको ६० किलो सुन, भेपमार्फत आएको सुन र अन्य नाकाबाट भएको तस्करी सम्बन्धमा प्रतिवेदन अध्ययन हुनेछ । जाँचबुझ आयोगले राजनीतिक नेतृत्वलाई जोगाइएको आरोप लगाउँदै यसअघि सीआईबीकी प्रमुख किरण बज्राचार्यसहित अनुसन्धानमा संलग्न एसपी र डीएसपीसम्मलाई कारवाही गर्न भनिएको छ । 

आयोगले सुन तस्करीमा संलग्नहरूसँग बयान, स्थलगत अध्ययन, प्राविधिक विश्लेषणलगायतका आधारमा केही महत्वपूर्ण सिफारिसहरू सहित गृह मन्त्रालयलाई चैत १ गते प्रतिवेदन बुझाएको थियो । माओवादीका उपाध्यक्ष कृष्णबहादुर महरासहित अन्य केही व्यक्तिलाई कारवाही गर्न आयोगले सिफारिस गरेको छ ।