अबको ७५ वर्षमा नेपालको जनसंख्या दोब्बर हुनसक्ने

४ चैत, काठमाडौं । नेपालको जनसंख्या दोब्बर हुन अबको ७५ वर्ष लाग्ने भएको छ । अहिलेकै गतिमा नेपालको जनसंख्या बढेमा ७५ वर्ष पछि दोब्बर हुनेछ । राष्ट्रिय तथ्यांक कार्यालयले २०७८ मा भएको जनगणनाको जनसङ्ख्याको संरचना प्रतिवेदनमार्फत उक्त प्रक्षेपण गरेको हो । 

हाल नेपालको जनसंख्या २ करोड ९१ लाख ६४ हजार ५ सय ७८ छ । वि.सं. १९६८ देखि २०७८ सम्म जनसङ्ख्याको आकार ५ गुणाले बढेको देखिएको कार्यालयले जनाएको छ । ताजा नतिजाअनुसार जनगणना अवधिको वार्षिक औसत जनसंख्या वृद्धिदर ०.९२ प्रतिशत छ । जुन २०६८ मा १.३५ प्रतिशत थियो । 

कार्यालयले अहिलेको गतिअनुसार जनसंख्या दोब्बर हुन ७५ वर्ष लाग्ने भन्दै वि.सं. १९६८ मा नेपालको जनघनत्व प्रति वर्गकिमी ३८ जना रहेकामा २०७८ मा बढेर १९८ जना पुगेको जनाएको छ । कार्यालयका अनुसार २०३८ मा नेपालको कुल जनसङ्ख्यामा तराईको जनसंख्या ३८ प्रतिशत थियो । जुन २०७८ मा बढेर लगभग ५४ प्रतिशत पुगेको छ । 

प्रदेश अनुसार मधेश र बागमतीमा सबैभन्दा बढी झण्डै २१ प्रतिशत जनसंख्या छ भने सबैभन्दा कम कर्णालीमा ५.७९ प्रतिशत छ । गत १० वर्षको अवधिमा सबैभन्दा धेरै लुम्बिनीमा १३.८ प्रतिशत र सबैभन्दा कम गण्डकीमा २.६ प्रतिशतले जनसंख्या थप छ । विगत १ दशकको जनसंख्या वृद्धिदर अनुसार लुम्बिनी (१.२४ प्रतिशत) र मधेश (१.२ प्रतिशत) मा वार्षिक जनसंख्या वृद्धिदर १ प्रतिशतभन्दा बढी छ भने सबैभन्दा कम गण्डकीमा ०.२५ प्रतिशत छ ।