तेह्रथुमको फेदापमा आगलागी, १६ घर जलेर नष्ट

४ चैत्र, तेह्रथुम । आइतबार दिउँसो सुरु भएको आगलागीमा परी तेह्रथुम फेदाप गाउँपालिका–१ सिम्लेका ५ वटा बस्तीका १६ घर जलेर नष्ट भएका छन् । आगलागीका कारण अहिलेसम्म १६ वटा घर जलेर नष्ट  भएका छन ।

आगलागीमा परी सिम्लेका रातमाटे, बाँझीगरा, टाहारी, अम्फुवा र मयन्तपा गाउँका घर जलेका हुन् । बस्तीमा अहिले पनि आगो लागिरहेको छ । गाउँमा बस्ती पातलो भएको र बस्ती वरिपरि जंगल भएकाले आगो नियन्त्रण गर्न समस्या भएको छ । 

आगो नियन्त्रणका लागि सदरमुकाम म्याङलुङबाट नेपाल प्रहरी र सशस्त्र प्रहरी पुगेको प्रहरी नायव उपरीक्षक राजन चापागाँइले बताए । स्थानीय र प्रहरीले संयुक्त रुपमा आगो नियन्त्रणको प्रयास गरिरहेका छन् । तर घना जंगल र सुख्खा क्षेत्र भएकाले नियन्त्रणमा कठिनाइ भइरहेको प्रहरीले जनाएको छ ।

गाउँका ५ वटा बस्ती जलाई सकेको आगो अन्य बस्तीतर्फ सल्किएको छ । पानी नभएका कारण निभाउन समस्या भएको स्थानीयको भनाइ छ । जलेकामध्ये अधिकांश घरहरूमा मान्छे बस्ने गरेका थिए । गाउँमा सडक साँघुरो भएकाले दमकल जान नसक्ने अवस्था छ ।