बैंकिङ कसुरको आरोपमा फणिन्द्र नेपाल पक्राउ

काठमाडौं । ग्रेटर नेपाल अभियानका संयोजक फणिन्द्र नेपाल बैंकिङ कसुरको आरोपमा पक्राउ परेका छन् । गौशालामा रहेको इडेन गार्डेन नामक स्कुल सञ्चालक समेत रहेका नेपालले घरबेटीलाई तिर्नुपर्ने भाडा चेकमार्फत भुक्तानी गरेकोमा सो चेक बाउन्स भएपछि पीडितले दिएको उजुरीको आधारमा प्रहरीले उनलाई आज पक्राउ गरेको हो ।

महानगरीय प्रहरी परिसर काठमाडौंका प्रवक्ता डीएसपी होविन्द्र बोगटीले घरधनी नरेश कुमार न्यौपानेले दिएको उजुरीको आधारमा नेपाललाई मंगलबार पक्राउ गरिएको जानकारी दिएका छन् ।

नेपालले न्यौपानेलाई तिर्नुपर्ने ६ लाख पटक–पटकको ताकेतापछि चेक दिएका थिए । तर, नेपालले दिएको चेक बाउन्स भएपछि प्रहरीकहाँ पुगेको हो ।

गौशालाबाट पक्राउ परेका नेपाललाई बैकिङ कसुरमा म्याद थप गरेर थप अनुसन्धान भइरहेको प्रहरीले जानकारी दिएको छ ।

यसैबीच नेपालले न्यौपानेले हिसाव गोलमाल गरेर आफूलाई फसाउन खोजेको दाबी गरेका छन् ।

‘मैले नरेश कुमार न्यौपाने नामक घरधनीलाई घरभाडा बापत रू ६ लाखको चेक दिएको थिएँ । चेकको भुक्तानी मितिमा ६ लाख नगद रकम बुझी आज चेक ल्याउन बिर्सिएँ , भोलि चेक फिर्ता गर्छु भनेकोमा चेक बाउन्स गरेर मलाई फसाउने काम भयो ।’

पैसा लिइसकेपछि न्यौपानेसँग चेक पटक–पटक फिर्ता माग्दा नदिएर अहिले चेक बाउन्स गरी पक्राउ गर्ने भूमिका खेलको आरोप नेपालको छ ।