महरालाई पार्टीबाट निलम्बन गर्ने विषयमा माओवादीले निर्णय लिन सकेन

६ चैत, काठमाडौं । नेकपा माओवादीले सुन प्रकरणमा पक्राउ परेका पार्टी उपाध्यक्ष कृष्णबहादुर महरालाई पार्टीबाट कारवाही गर्ने कि नगर्ने भन्ने विषयमा मंगलबार बिहानको बैठकमा निर्णय हुन सकेन । उनलाई थप छलफलपछि मात्र के गर्ने भन्ने निष्कर्षमा बैठक पुगेको प्रवक्ता अग्नि सापकोटाले जानकारी दिए । 

सुन तस्करी प्रकरणमा नेपाल प्रहरीको केन्द्रीय अनुसन्धान ब्यूरो (सीआईबी) ले सोमबार पूर्वसभामुख समेत रहेका महरालाई नियन्त्रणमा लिएको छ । उनीमाथि ४ दिनको म्याद लिएर अनुसन्धान भइरहेको छ । माओवादीको पदाधिकारी बैठकमा उपाध्यक्ष कृष्णबहादुर महराका विषयमा छलफल भएपनि निलम्बन गर्ने कि नगर्ने विषयमा भने पार्टीमा एक मत हुन सकेन् । 

बैठकपछि सापकोटाले भने, ‘उपाध्यक्ष कृष्णबहादुर महराको विषयमा राम्रो सित छलफल भएको छ । यसको हरेक पाटो पक्षमा गम्भीरतापूर्वक छलफल भएको छ । छिटो भन्दा छिटो निष्कर्षमा पुग्छ ।’ महरालाई जिम्मेवारीबाट मुक्त गर्ने विषयमा के कुरा भयो भन्ने पत्रकारको प्रश्नमा सापकोटा भने, ‘विविध कोणबाट छलफल भइरहेको छ । निष्कर्ष आएको छैन ।’