प्रहरी हिरासतमा रहेका महरालाई उपाध्यक्ष पदबाट राजीनामा दिन प्रचण्डको दवाव

६ चैत, काठमाडौं । नेकपा माओवादीका अध्यक्ष पुष्पकमल दाहाल 'प्रचण्ड'ले सुन तस्करी प्रकरणमा पक्राउ परेका पार्टी उपाध्यक्ष कृष्णबहादुर महरालाई राजीनामा दिन दवाव दिएका छन् । मंगलबार बिहान बसेको पदाधिकारी बैठकमा महरालाई निलम्बन गर्ने विषयमा सहमति नभएपछि प्रचण्डले फोन गरेर राजीनामा दिन दवाव दिएका हुन् ।  

प्रहरी नियन्त्रणमै नर्भिक अस्पतालमा रहेका महरालाई प्रचण्डले बैठकमा सहमति नभएपछि फोन गरेका थिए । बालुवाटारस्थित प्रधानमन्त्री निवासमा बसेको बैठककै बीचमा प्रचण्डले महरालाई फोन गरेका हुन् । सो क्रममा प्रचण्डले प्रश्न उठिसकेकाले अब के गरौँ निलम्बन गर्दा तपाईँलाई नरमाइलो हुने भयो, राजीनामा दिनुभयो भने दुवैतिर सहज हुन्छ भनेका थिए ।  
 
‘प्रधानमन्त्रीज्युले महरालाई फोन गरेर आफै राजीनामा दिनुहुन्छ कि निलम्बन गरौँ भनेर सोध्नुभयो’, बैठकका सहभागी एक नेताले भने, ‘यस विषयमा एक घण्टामा महराले जानकारी दिने बताउनु भएको छ ।’ महराको जवाफ आएपछि थप कारबाही प्रक्रिया अगाडि बढाउने निर्णय भएको ती पदाधिकारीको भनाइ छ ।
 
बैठकमा केही नेताहरूले सुन तस्करीमा मुछिएका महरालाई निलम्बन गर्नुपर्ने माग गरेका थिए । प्रचण्डले पनि महरालाई बचाउने पक्षमा आफू नभएको र राज्यले गरेको छानबिन प्रक्रियामा सहयोग गर्ने बताएका थिए । यद्यपि निलम्बन गर्ने विषयमा महराको प्रतिक्रिया आएपछि मात्रै थप छलफल गरेर कारबाही प्रक्रिया अगाडि बढाउने निर्णय भएको बैठकपछि प्रवक्ता अग्नि सापकोटाले बताए ।