गृहमन्त्रीविरुद्ध सिंहदरबार अगाडि प्रदर्शन गर्ने नेविसंघका कार्यकर्ता पक्राउ

६ चैत, काठमाडौं । उपप्रधान एवं गृहमन्त्री रवि लामिछानेविरुद्ध सिंहदरबार अगाडि प्रदर्शनमा उत्रिएका नेपाल विद्यार्थी संघ (नेविसंघ) का कार्यकर्तालाई प्रहरीले नियन्त्रणमा लिएको छ । प्रदर्शनमा सहभागीलाई प्रहरीले नियन्त्रणमा लिएको हो । 

सहकारीको रकम हिनामिना प्रकरणमा मुछिएका लामिछानेमाथि नैतिक प्रश्न हुँदाहुँदै उपप्रधान तथा गृहमन्त्रीमा नियुक्त गरेको भन्दै नेपाली कांग्रेसको भ्रातृसंगठनले विरोध जनाएको हो । नेपाली कांग्रेसले संसदमा र नेविसंघले सडकमार्फत आवाज उठाउँदै आएको छ ।

यसै क्रममा सोमबार चाबहिलको पशुपति क्याम्पसका नेविसंघ विद्यार्थीहरूले लामिछानेको पुत्ला दहन गरेका थिए । उनीहरू मंगलबार बिहान सिंहदरबारको दक्षिण गेट अगाडि प्लेकार्ड बोकेर प्रदर्शनमा उत्रिएका थिए । उनीहरुले अर्थमन्त्री वर्षमान पुनविरुद्ध पनि प्रदर्शन गरेका थिए । अहिले प्रहरीले नेविसंघका कार्यकर्तालाई तितरवितर बनाएको छ ।