सहसचिव र सीडीओ गरी १८ जनाको सरुवा, अध्यागमनमा पुगे निरौला

६ चैत, काठमाडौं । गृह मन्त्रालयले सहसचिव र प्रमुख जिल्ला अधिकारी गरी १८ जना कर्मचारीकाे सरुवा गरेको छ । मन्त्रालयले ११ वटा जिल्लाहरूमा प्रमुख जिल्ला अधिकारी (सीडीओ) हरुको सरुवा गर्दै अध्यागमन विभागको महानिर्देशकमा कोष हरि निरौलालाई पठाएको छ । 

६ फागुनमा तत्कालीन महानिर्देशक रुद्रसिंह तामाङविरूद्ध अख्तियार दुरुपयोग अनुसन्धान आयोगमा मुद्दा परेपछि विभाग महानिर्देशक विहीन थियो । त्रिभुवन विमानस्थल अध्यागमन कार्यालयका प्रमुख गोगनबहादुर हमाललाई राष्ट्रिय विपद जोखिम न्यूनीकरण तथा व्यवस्थापन प्राधिकरणमा पठाएर उनको ठाउँमा नरबहादुर थापालाई पठाइएको छ ।

सरुवा भएका सीडीओहरूमा रामराज कडरियालाई धनुषा, शिवकुमार कार्कीलाई खोटाङ, यज्ञराज जोशीलाई दार्चुला, मीना अर्याललाई तेह्रथुम र रवीन्द्र आचार्यलाई ताप्लेजुङ, सङ्खुवासभामा ध्रुबबहादुर खड्का, अर्घाखाँचीमा सूर्यबहादुर क्षेत्री, लमजुङमा बुद्धबहादुर गुरुङ, ओखलढुंगामा नारायण ढकाल, रोल्पामा खिमबहादुर रायमाझी र जाजरकोटमा ऋषिराज आचार्यलाई प्रमुख जिल्ला अधिकारी बनाइ पठाइएकाे छ । 

कमलराज ढकाल सहसचिवका रूपमा गृह मन्त्रालयमा सरुवा भएका छन् भने विभिन्न विभाग र कार्यालयहरूमा पनि नयाँ जिम्मेवारी तोकेर सरुवा गरिएको गृह मन्त्रालयले  जनाएको छ ।