कांग्रेसको माग अनुसार गृहमन्त्रीको सहकारी ठगी प्रकरणको संसदीय समिति बनाउन सकिन्नः ओली

६ चैत, काठमाडौं । नेकपा एमालेका अध्यक्ष केपी शर्मा ओलीले उपप्रधान एवं गृहमन्त्री रवि लामिछाने जोडिएको सहकारी ठगी प्रकरणको छानबिनका लागि संसदीय छानबिन समिति बनाउन नसकिने बताएका छन् । उनले गृहमन्त्री लामिछाने सहकारी प्रकरणमा नमुछिएको दावी गरेका छन् । 

मंगलबार प्रतिनिधिसभा बैठकमा नेपाली कांग्रेसले लामिछानेमाथि छानबिनका लागि संसदीय समिति गठन हुनुपर्ने अडान राखेको विषयमा संसद परिसरमा पत्रकारहरूसँग कुरा गर्दै ओलीले कांग्रेसले प्रतिशोधपूर्ण अभिव्यक्ति मात्र दिएको र यसमा छानविन समिति बनाउन नसकिने बताए । 

सरकार भन्दा बाहिर हुनेबित्तिकै नेपाली कांग्रेस जस्तो पार्टीले कुनै आवेश, उत्तेजना देखाउने, प्रतिशोधपूर्ण अभिव्यक्ति, क्रियाकलाप गर्ने र संसद अवरुद्ध गर्ने जस्ता क्रियाकलाप गर्नु हुँदैन’, ओलीले भने, ‘हामी नेपाली कांग्रेसबाट एउटा परिपक्व प्रतिपक्षको भूमिका माग्दछौं । संसदीय छानबिन समिति कसरी र के का लागि बनाउने हो । गृहमन्त्रीका लागि सम्भव नै छैन ।’