आदर्शका गफ छाट्ने ठाकुरबाबा नगरपालिकामा छैन दमकल

•दीपक शर्मा 
६ चैत, गुलरिया । बर्दिया र कैलालीको सीमानामा रहेको कर्णाली पुलमा करिब एक हप्ता अगाडि आगलागी भयो । धन्न कुनै मानवीय क्षति हुन पाएन, तर समयमै आगो नियन्त्रणमा आएको भए अन्य क्षति कम हुन्थ्यो । 

यस्तै केही दिन पहिले ठाकुर बाबा नगरपालिकास्थित एक घरमा आगलागी भयो, दुर्भाग्यवश एकजना मानिसको मृत्यु भयो । आगो नियन्त्रणमा लिन नसकेकै कारण ती मानिसको जलेर मृत्यु भयो । यी पछिल्लो पटक भएका प्रतिनिधि घटना हुन् । 

अब बेला हावा, हुरीबतास र आगलागीको सिजन शुरु भएको छ । यस्ता घटनामा कम क्षति हुनबाट जोगिन दमकलको आवश्यकता पर्दछ । तर बर्दियाको ठाकुर बाबा नगरपालिकाले एउटा दमकल समेत खरिद गरेको छैन । सो पालिकाले पालिका प्रमुख, कार्यालय प्रमुखदेखि अन्य पदमा रहेकाहरूको लागि सुविधायुक्त चारपाग्रे गाडी खरिद गरेको छ । त्यति मात्र होइन रोलरदेखि डोजरसम्म पनि खरिद गर्ने पालिकाले अत्यावश्यक दमकल भने खरिद नगर्दा पालिकाबासीले अकाल मै ज्यान गुमाउनु परेको छ भने भौतिक संरचनाको पनि ठूलो क्षति व्यहोरिरहेका छन ।

कर्णाली पुलमा लागेको आगो निभाउनका लागी सबैभन्दा नजिकको ठाकुर बाबा नगरपालिकाको दमकल भएको भए क्षति कम हुने थियो । पुर्वपश्चिम राजमार्ग सँगै रहेको पालिकाको कार्यालय कर्णाली पुलदेखि २२ किलोमिटर पूर्वतर्फ रहेको छ । पालिकामा दमकल नहुँदा कैलालीको लम्कीचुहा नगरपालिका, टीकापुर नगरपालिका र बर्दियाको मधुवन नगरपालिकाबाट दमकल जानुपर्ने अवस्था आइलाग्यो ।

नगर प्रमुख तिलकराम लम्साल आदर्शका गफ छाटन व्यस्त देखिन्छन् । त्यसमा हो मा हो मिलाउने काम प्रमुख प्रशासकीय अधिकृत रामहरि रिजालले गर्दै आइरहेका छन् । पालिकालाई दमकलको एकदमै आवश्यकता छ भनेर स्थानीयले पटक पटक आग्रह गर्दा पनि कानमा तेल हालेर जिम्मेवार व्यक्तिहरू बसेको आरोप स्थानीयको छ ।

ठाकुर बाबा नगरपालिकाका प्रमुख प्रशासकीय अधिकृत रामहरि रिजालले दमकल खरिद गर्नका लागि भर्खरै प्रकृया अगाडि बढेको बताए । आगलागी हुन्छ, दमकल चाहिन्छ भन्ने सामान्य सोच नभएका जनप्रतिनिधि र त्यसमा ताली ठोक्ने कर्मचारी भएपछि नगरको अवस्था कस्तो होला सोच्न पनि सकिदैन् ।