इलाम उपनिर्वाचनको उम्मेदवारका लागि कांग्रेसबाट ७ जना सिफारिस

६ चैत, काठमाडौं । नेपाली कांग्रेसले इलाम क्षेत्र नम्बर २ को उपनिर्वाचनको उम्मेदवारका लागि ७ जनाको नाम सिफारिस गरेको छ । मंगलबार इलामको चुलाचुलीमा बसेको पार्टी क्षेत्रीय कार्यसमितिको बैठकले उम्मेदवारको नाम सिफारिस गरेको हो । 

सिफारिस नामहरूमा महासमिति सदस्य भेषराज आचार्य, केशव थापा, जिल्ला सभापति डम्बर खड्का, संविधानसभा सदस्य नगेन्द्र कुमाल, रमेश लिङ्देन, चन्द्रमाया लिम्बु र चन्द्रकला राई रहेका छन् । यी नाममा जिल्ला र प्रदेश कार्यसमिति राय लेखेर पठाउनेछ र केन्द्रले फाइनल गर्नेछ । 

इलाम क्षेत्र नम्बर २ मा आउँदो वैशाख १५ मा उपनिर्वाचन हुँदैछ । गएको निर्वाचनमा एमालेबाट निर्वाचित सांसद सुवास नेम्वाङको  मृत्यु भएपछि उपनिर्वाचन हुन लागेको हो । उपनिर्वाचनका लागि निर्वाचन आयोगले चैत २४ गतेका लागि उम्मेदवारी दर्ताको मिति तोकेको छ ।