गृहमन्त्री लामिछानेमाथि छानबिन गर्न समिति गठन नगरेसम्म संसद सहज रुपमा चल्न सक्दैनः कांग्रेस

७ चैत, काठमाडौं । नेपाली कांग्रेसले प्रतिनिधि सभाको अर्को बैठकसम्ममा उपप्रधानमन्त्री तथा गृहमन्त्री रवि लामिछाने मुछिएको सहकारीको रकम हिनामिना प्रकरणको छानबिन गर्न संसदीय समिति नबनाए संसद बैठक चल्न नसक्ने दोहोर्याएको छ । 

आउँदो सदनको बैठकबाट छानविन समिति गठन भएको घोषणा हुनुपर्ने कांग्रेसको माग छ । प्रतिनिधि सभाको बुधबारको बैठकको सुरुमा बोल्दै कांग्रेस सांसद ईश्वरीदेवी न्यौपानेले रवि लामिछानेले सहकारीको रकम हिनामिना गरेको प्रमाण छैन भन्ने प्रधानमन्त्री र प्रमाण छ भन्ने हामी प्रतिपक्ष भएकाले यसको छिनोफानो गर्न समिति गठन गर्नुपर्ने बताइन् ।

अन्यथा संसद अवरुद्ध हुने संकेत गर्दै उनले भनिन्, ‘आउँदो सदनमा सरकार पक्षले समिति बनाउन मानेन भने यो सदन हामीले होइन, उहाँहरूलाई चाहिएको रहेनछ, उहाँहरूलाई जनताको काम चाहिएको छैन भन्ने बुझ्ने छौं ।’ प्रधानमन्त्री पुष्पकमल दाहाल प्रचण्डले मंगलबारको संसद बैठकमा रवि लामिछानेविरुद्ध प्रमाण नभएको ब्रिफिङ प्रहरीले गरेको जानकारी गराएका थिए ।

राजनीतिमा आउनुअघि ग्यालेक्सी टीभीको प्रबन्ध निर्देशक रहेका रवि लामिछानेका नाममा समेत रकम निकालेको देखिएपछि उनमाथि निरन्तर प्रश्न उठ्दै आएको छ । कांग्रेसले यस विषयमा छानबिन गर्न संसदीय समिति गठन हुनुपर्ने र लामिछानेले राजीनामा दिनुपर्ने माग गर्दै आएको छ ।