सरुवा भएका कर्मचारीलाई गृहमन्त्रीको निर्देशन, ‘कानुनले प्रत्यायोजन गरेको अधिकार प्रयोग गर्न नडराउनू’

७ चैत, काठमाडौं । उपप्रधान एवं गृहमन्त्री रवि लामिछानेले आफ्नो जिम्मेवारी पूर्ण क्षमताका साथ काम पुरा गर्न मातहतका कर्मचारीलाई निर्देशन दिएका छन् । गृहमन्त्री लामिछानेले बुधबार सरुवा भएका सरकारी अधिकारीलाई सो निर्देशन दिएका हुन् ।
 
उनले नागरिकमा सरकारको व्यवहारिक अनुभूत गराउने गरी कानुनले प्रत्यायोजन गरेको अधिकारअनुसार काम गर्न समेत कर्मचारीहरूलाई निर्देशन दिए । नागरिकमा सरकारको व्यवहारिक अनुभूत गराउने गरी कानुनले प्रत्यायोजन गरेको अधिकारअनुसार काम गर्न उनको निर्देशन छ । सरकारले जनतामा तत्काल आशा जगाउन सक्नुपर्ने र आफ्नो जिम्मेवारीको क्षेत्रमा गलत तत्वको सञ्जाल तोड्नु पर्ने उनले बताए । 

उनले सेवा प्रवाहमा तत्कालै सुधारका योजना बनाएर लागू गर्न समेत निर्देशन दिएका छन् ।  ‘सेवा प्रवाहमा तत्काल सुधार, गुण्डागर्दी, तस्करी, राजस्व चुहावट र प्राकृतिक स्रोतको दोहन नियन्त्रण, सामाजिक सद्भाव अभिवृद्धि, विपद् व्यवस्थापन, सवारी दुर्घटना न्यूनीकरणलगायत क्षेत्रमा तत्कालै सुधारका योजना बनाएर लागू गर्न गृहमन्त्री लामिछानेले निर्देशन दिए । 

गृहमन्त्री लामिछानेले कर्मचारीहरू राजनीतिक नेतृत्वको गलत दबाब र प्रभावमा पर्न नहुने समेत बताए । ‘आज्ञापालक होइन, सृजनशील प्रशासक बन्नुस् । नागरिकबाट मान सम्मान खोज्ने होइन, उनीहरूलाई सेवा गर्नुस् । औपचारिक कार्यक्रममा धेरै समय बर्बाद नगर्नुस् । जिम्मेवारी दिँदा नै सक्दिन भन्नुस्, लिएपछि नभाग्नुस् ।’

गृहमन्त्रालयले अध्यागमन विभागका महानिर्देशक, निर्देशक, अध्यागमन कार्यालय त्रिभुवन विमानस्थल, अध्यागमन कार्यालय  गौतम बुद्ध अन्तर्राष्ट्रिय विमानस्थल, राष्ट्रिय विपद् जोखिम न्यूनीकरण तथा व्यवस्थापन प्राधिकरण, गृहमन्त्रालय र केही जिल्ला प्रशासन कार्यालयमा चैत्र ६ गते उपसचिव र सहसचिव गरी २२ जनाको सरुवा गरेको थियो । 
  
उनीहरुलाई निर्देशित गर्दै लामिछानेले नागरिकमा सरकारको व्यवहारिक अनुभूत गराउने गरी कानुनले प्रत्यायोजन गरेको अधिकारअनुसार काम र सेवा प्रवाहमा तत्काल सुधार, गुण्डागर्दी, तस्करी, राजस्व चुहावट र प्राकृतिक स्रोतको दोहन नियन्त्रण, सामाजिक सद्भाव अभिबृद्धि, विपद् व्यवस्थापन, सवारी दुर्घटना न्यूनीकरणलगायत क्षेत्रमा तत्कालै सुधारका योजना बनाएर लागू गर्न भनेका हुन् ।