चौधरी समूहमा सीआईबीको निगरानी, वशन्तको बयान सकियो

७ चैत, काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी) ले बाँसबारी छाला जुत्ता कारखाना लिमिटेडको नाममा रहेको १० रोपनी जग्गा हडपिएको प्रकरणमा चौधरी समूहका अधिकारीसँग बयान लिन सुरु गरेको छ । जस अनुसार बुधबार सीआईबीले वशन्त चौधरीसँग बयान लिएको छ ।

सीआईबीले उद्योगपति तथा नेपाली कांग्रेसका सांसद विनोद चौधरीको पनि बयान लिने तयारी गरेको छ । चौधरी सांसद रहेकाले अनुसन्धान अघि बढाउन सीआईबीले सभामुख देवराज घिमिरेलाई समेत जानकारी गराएको छ । कारखानाको जग्गा व्यक्तिको नाममा ल्याएको खुलेपछि यसअघि विनोदका भाइ अरुणलाई सीआईबीले पक्राउ गरेको थियो ।

पछि अदालतले उनलाई थुनाबाहिर नै राखेर अनुसन्धान गर्ने आदेश गरेपछि उनी थुनामुक्त भएका थिए । यसै प्रकरणमा सीआईबीले वशन्त चौधरीलाई बयान कागज गराएर छाडेको छ । उनले पुरानो विषय भएको बताउँदै सरकारी जग्गा भए नभएको थाहा नभएको बताएका थिए । 

सरकारी स्वामित्वको बाँसबारी छालाजुत्ता कारखानाको १० रोपनी जग्गा निजी स्वामित्वको च्याम्पियन फुटवेयर प्रालिलाई गैरकानुनी रुपमा बिक्री गरिएको थियो । हाल च्याम्पियन फुटवेयर बन्द भइसकेको छ र त्यसको सम्पत्ति सीजी चाँदबाग रेसिडेन्सी प्रालिको नाममा छ । तत्कालीन च्याम्पियन फुटवेयर लिमिटेडहरुको शेयर सदस्यहरुमध्येमा वसन्त चौधरी पनि एक थिए ।

सीआईबीका एक अनुसन्धान अधिकृतका अनुसार, त्यसबेला च्याम्पियन फुटवेयरमा लुनकरणदास चौधरीको २ हजार १०० कित्ता शेयर थियो भने विनोदकुमार चौधरी, वसन्त चौधरी, अरुणकुमार चौधरी र महेशकुमार अग्रवालको समान २००÷२०० कित्ता शेयर थियो ।