राष्ट्रिय सभा ७ र प्रतिनिधि सभा १० दिनका लागि बन्द

७ चैत, काठमाडौं । राष्ट्रिय सभा सात दिन र प्रतिनिधि सभा १० दिनका लागि बन्द गरिएको छ । प्रतिनिधिसभा १० दिन बन्द हुँदा राष्ट्रिय सभा पनि एक साताका लागि बन्द भएको छ । बुधबार आगामी बजेटको सिद्धान्त र प्राथमिकतामाथिको छलफल सकाएको राष्ट्रिय सभा १५ चैत दिउँसो १ बजेसम्म स्थगित गरिएको हो । 

सभामुख र संसद्का पदाधिकारीको जेनेभा भ्रमणका लागि संघीय संसद्को तल्लो सदन १० दिनका लागि बन्द गरिएको हो । अन्तरव्यवस्थापिका संसद् आइपियूको सम्मेलनमा भाग लिन सभामुख देवराज घिमिरेको नेतृत्वका ठूला चार दलका प्रमुख सचेतकसहित १० सदस्यीय टोली ८ चैतमा स्विट्जरल्यान्डस्थित जेनेभा जाने कार्यक्रम छ । 

संसद्का पदाधिकारीको भ्रमणलाई मध्यनजर गरेर आगामी आव ०८०÷८१ को विनियोजन विधेयकको सिद्धान्त र प्राथमिकतामाथिको छलफल बुधबार हतारोमा सकेर प्रतिनिधिसभा बैठक १८ चैत बिहान ११ बजेसम्मका लागि स्थगित गरिएको हो । 

सिद्धान्त र प्राथमिकतामा पर्याप्त छलफल गर्न सरकारले अध्यादेशमार्फत फागुनमै संसदमा पेस गर्ने व्यवस्था गरे पनि संसद्का पदाधिकारीले भने कर्मकाण्डी रूपमै छलफल सकेर जेनेभा भ्रमणतिर लागेका हुन् । संसद् सचिवालयका अनुसार १४ फागुनमा प्रतिनिधिसभामा प्रस्तुत आगामी बजेटको बजेटका सिद्धान्त र प्राथमिकतामाथि १ चैतबाट छलफल प्रारम्भ भएर ५ र ७ गते गरी तीन दिनसम्म चलेको छ ।