प्रति तोला १ लाख २८ हजार नजिक पुग्यो सुनको मूल्य

८ चैत्र, काठमाडौं । बिहीबार नेपाली बजारमा सुनको मूल्य तोलको १ लाख २८ हजार नजिक पुगेको छ । यो अहिले सम्मको नयाँ रेकर्ड हो । फागुन २७ गते १ लाख २६ हजार रुपैयाँ पुगेर रेकर्ड मूल्य कायम गरेको छापावाला सुनको मूल्यले बिहीबार उक्त रेकर्ड तोडेको हो ।

बिहीबार छापावाला सुनको मूल्य १ लाख २७ हजार ८०० रुपैयाँमा कारोबार भइरहेको छ । सुनको मूल्य आज एकैदिन प्रतितोला २६ सय रुपैयाँले बढेको हो । बुधबार छापावाला सुनको मूल्य १ लाख २५ हजार २ सय रुपैयाँ कायम गरिएको थियो ।

नेपाल सुनचाँदी व्यवसायी महासंघका अनुसार बिहीबार तेजावी सुन प्रतितोला १ लाख २७ हजार २०० रुपैयाँमा कारोबार भइरहेको छ । बुधबार प्रतितोला तेजावी सुन १ लाख २४ हजार ६०० रुपैयाँमा कारोबार भएको थियो ।

यस्तै, बिहीबार चाँदी १ हजार ५५५ रुपैयाँमा कारोबार भइरहेको छ । बिहीबार चाँदीको भाउ ३५ रुपैयाँ बढेको हो । बुधबार चाँदी प्रतितोला १ हजार ५२० रुपैयाँमा कारोबार भएको थियो ।

अन्तराष्ट्रिय बजारमा आज सुन प्रतिऔंस सुन २ हजार २०३ दशमलव ५३ डलरमा कारोबार भइरहेको छ भने प्रतिऔंस चाँदी २५ दशमलव ६५ डलरमा कारोबार भइरहेको छ ।