निजगढमा निःशुल्क स्वास्थ्य शिविरबाट ९ सय बढी महिला लाभान्वित

♦ सुरुचि भण्डारी

८ चैत, बारा । महिलाहरूको स्वास्थ्य सम्बन्धी समस्या अधिक रहेको भन्दै निजगढ वडा नम्बर ५ र ६ मा मंगलबार र बुधबार निःशुल्क स्वास्थ्य शिविर आयोजना गरिएको शिविर सम्पन्न भएको छ ।

साथी नेपालको आयोजना तथा काठमाडौं वीर हस्पिटल र निजगढ सामुदायिक अस्पतालको सहयोगमा सामुदायिक सेवा प्रतिष्ठान भक्तपुरको प्राविधिक सहयोगमा भएको शिविरमा दुबै वडाका ९ सय भन्दा बढी महिला लाभान्वित भएका छन । 

निजगढ नगरपालिका वडा नम्बर ५ र ६ को सहकार्यमा स्त्री रोग विशेषज्ञ डा. आशिष बस्नेत सहितको टोलीले पहिलो दिन वडा नम्बर ५ मा ४ सय ७५ बिरामीको स्वास्थ्य जाँच तथा उपचार गरेका थिए भने दोस्रो दिन वडा नम्बर ६ मा ४ सय २५ जनाको स्वास्थ्य जाँच तथा उपचार गरिएको हो । 

शिविरमा महिलाहरूको पाठेघर खस्ने समस्या, फिस्टुला, यौन रोग, पाठेघरको मुखको क्यान्सर लगायतको परीक्षण तथा उपचार गरिएको थियो ।

पाठेघर झरेर जटिल अवस्थामा पुगेका महिलाहरूलाई सुविधा सम्पन्न अस्पतालमा लगेर शल्यक्रिया सेवा प्रदान गरिने आयोजक साथी नेपालकी अध्यक्ष सरिता सापकोटाले बताइन । 

महिलाहरूको स्वास्थ्य अवस्थामा सुधार गर्न शिविरको आयोजना गरिएको अध्यक्ष सापकोटाले जानकारी दिइन । संविधान सभाका सदस्य एवं नेकपा एमालेका नेता पुरुषोत्तम पौडेलले शिविरको उद्घाटन गरेका थिए ।