नेपाल मेडिकल कलेजका स्टाफ नर्सहरूलाई लाइफ सपोर्टको तालिम

९ चैत, काठमाडौं । नेपाल मेडिकल कलेजका स्टाफ नर्सहरूलाई एडभान्स कार्डिएक लाइफ सपोर्ट, बेसिक लाइफ सपोर्ट तथा एयरवेज म्यानेजमेन्ट सम्बन्धी तालिम दिइएको छ । कलेजको नर्सिङ विभाग, क्रिटिकल केयर तथा इमरजेन्सी म्यानेजमेन्टले दिएको चार दिने तालिममा १०३ जना स्टाफ नर्सहरू सहभागी थिए ।

कलेजमा कार्यरत स्टाफ नर्सहरूको क्षमता विकास गराउने उद्देश्यका साथ कलेजले यो तालिम दिएको हो । तालिममा सहभागी स्टाफ नर्सहरूलाई उपचारका क्रममा बिरामीको शारीरिक स्वास्थ्य अवस्था हेरेर उसलाई कस्तो प्रकारको लाइफ सपोर्ट चाहिएको निश्चित गरी प्रयोग गर्न सिकाइएको थियो । चिकित्सकीय सेवामा लाइफ सपोर्टका स्वास्थ्य सामग्रीहरू बिरामीलाई समयमै प्रयोग गर्दा हुने फाइदाहरूका बारेमा जानकारी दिइएको कलेजकी मेट्रोन नविना सिंहले जानकारी दिइन् ।

तालिममा सहभागी स्टाफ नर्सहरुले इमरजेन्सी तथा क्रिटिकल केयरमा आउने बिरामीहरूलाई सहज बनाउन लाइफ सपोर्ट स्वास्थ्य सामग्रीहरूको उपयोगिता, त्यसले दिने फाइदा बारे जानकारी पाइएको बताए । इमरजेन्सी र क्रिटिकल केयरमा आउने बिरामीहरूलाई समयमै उपचार गराउन सके उनीहरुको जीवन बचाउन लाइफ सपोर्ट सामग्रीहरूको महत्वपूर्ण भूमिका रहने बताइएको छ ।

कलेजले आफ्ना स्वास्थ्यकर्मीहरूलाई समयसापेक्ष दक्ष र सीपयुक्त बनाउन समय समयमा यस्ता तालिमहरू नियमित रुपमा गर्दै आइरहेको अस्पताल प्रशासनले जनाएको छ । पछिल्लो समय कलेज विरगञ्जमा सफल मेडिकल व्यवसायी, प्रख्यात सर्जन प्रा.डा. जैनुद्धिन अन्सारीको नेतृत्वमा गएसँगै स्वास्थ्य सेवालाई सुधार्दै चिकित्सक, स्टाफ नर्स तथा कर्मचारीहरूको क्षमता अभिबृद्धिका तालिमहरू पनि सञ्चालन गर्न थालिएको छ ।