सुन अनुसन्धानमा खटिएका सीआईबीका ४ निरीक्षकको सरुवा

११ चैत, काठमाडौं । सुन तस्करी जाँचबुझ आयोगले कारबाहीका लागि सिफारिस गरेपछि सुन तस्करी प्रकरणको अनुसन्धानमा खटिएका नेपाल प्रहरी केन्द्रीय अनुसन्धान ब्यूरो(सीआईबी) अधिकारीहरू धमाधम सरुवामा पर्न थालेका छन् । पछिल्लो पटक सीआईबीमा कार्यरत ४ प्रहरी निरीक्षक (इन्स्पेक्टर)को सरुवा भएको छ । 

सुन तस्करी जाँचबुझ आयोगले १ चैतमा बुझाएको प्रतिवेदनमा सीआईबीका एआईजी किरण बज्राचार्यसहित एसपी सञ्जयसिंह थापा, डीएसपीद्धय रुगम कुँवर र दुर्गा दाहाललाई विभागीय कारबाहीका लागि सिफारिस गरेपछि सबैलाई प्रहरी प्रधान कार्यालय सरुवा गरिएको थियो ।

अनुसन्धानमा खटिएकालाई अन्यत्र सरुवा गर्नुपर्ने भन्ने सिफारिसका आधारमा इन्स्पेक्टरहरूको पनि सरुवा गरिएको सीआईबीले जनाएको छ । सरुवामा पर्नेहरूमा इन्स्पेक्टर सुरेश खत्री, रञ्जित लामा,वकिल सिंह र कृष्ण श्रेष्ठ रहेका छन् । खत्रीलाई प्रहरी हेडक्वार्टरमा सरुवा गरिएको छ भने रञ्जित लामाको प्रधान कार्यालयमै सरुवा भएको छ ।

वकिल सिंहलाई नेपाल प्रहरी सशस्त्र प्रहरी गण नम्बर १ मा सरुवा गरिएको छ भने अर्का इन्स्पेक्टर कृष्ण श्रेष्ठलाई पहरा गणमा सरुवा गरिएको छ । यसअघि नक्कली भुटानी शरणार्थी प्रकरणको अनुसन्धान गरेका इन्स्पेक्टर राजु अधिकारीलाई सीआईबीमा लगिएको छ ।