होलीमा १०२ जना पक्राउ, ७८४ सवारी साधन कारबाहीमा

११ चैत, काठमाडौं । होली पर्वका दिन आइतबार देशभरबाट एक सय २ जनालाई प्रक्राउ गरेको प्रहरीले जनाएको छ । साढे ७ सय सवारी साधन नियन्त्रणमा लिइएको छ । जवरजस्ती रंग दल्ने, मादक पदार्थ सेवन गरी झैझगडा गर्ने र सार्वजनिक स्थलमा होहल्ला गर्नेलाई प्रहरीले नियन्त्रणमा लिएको नेपाल प्रहरीका प्रवक्ता भिमप्रसाद ढकालले जानकारी दिए ।

यसपटकको फागु पूर्णिमा विगत वर्ष भन्दा तुलनात्मक रुपमा शान्तिपूर्ण र ठूला अपराधका घटनाहरु नभएको प्रहरीको भनाइ छ । मापसे गरी सवारी सधान चलाउने, ट्राफिक नियम उल्लंघन गर्ने ७ सय ७५ सवारी साधनलाई होल्ड गरिएको प्रहरीले जनाएको छ ।

काठमाडौं उपत्यका प्रहरी कार्यालयकाअनुसार काठमाडौं, ललितपुर र भक्तपुरमा मात्रै साढे ६ सय मोटरसाईलक/स्कुटर होल्ड गरिएको छ । १५ वटा सवारी साधान पनि होल्डमा परेका छन् । कार्यालयका एसपी अवधेश बिष्टले लापरवाही गर्ने र मापसे गरि सवारी साधन चलाउनेलाई होल्ड गरिएको बताए ।

त्यस्तै काठमाडौंबाट ७०, भक्तपुरबाट ४ र ललितपुरबाट २ जनालाई प्रहरीले नियन्त्रणमा लिएको छ । बिष्टले पनि विगतका वर्षभन्दा शान्तिपूर्ण ढंगले फागु पूर्णिमा पर्व सकिएको जनाए । उपत्यका ट्राफिक एसएसपी जीवन श्रेष्ठका अनुसार आज ललितपुरको चापागाईं र भक्तपुरको ठिमीमा दुर्घटना भएको छ । ललितपुर दुर्घटनामा दुईजना गम्भीर घाइते भएको श्रेष्ठले बताए । भक्तपुरका घाइतेको अवस्था सामान्य छ ।